АҞӘА, 31 жьҭ – Спутник Аԥсны. Есышықәса жьҭаара 31 аҽны иазгәарҭоит Амшын еиқәа жәларбжьаратәи амш. Ари амш азгәаҭара аҳәаақәа ирҭагӡаны, Амшын еиқәа аҿықә аҿы иҟоу атәылақәа имҩаԥыргоит еиуеиԥшым аусмҩаԥгатәқәа уи ахьчареи ахылаԥшреи ирызку.
Амшын еиқәа 422 нызқь квадраттә километр амоуп, даҽа дыррақәак изларҳәо ала 436. Зегь иреиҳау аура 580 километр амоуп. Иреиҳау аҵаулара 2210 метр ыҟоуп, абжьаратә 1240 метр.
Амшын еиқәа иаакәыршаны иҟоуп атәылақәа: Аԥсны, Урыстәыла, Румыниа, Болгариа, Ҭырқәтәыла, Қырҭтәыла.
Амшын еиқәа иалалоит аӡиасқәа: Дунаи, Днепр, Днестр, Мзымҭа, Ԥсоу, Бзыб, Гәымсҭа, Егры уҳәа иҵегь.
Абри аҽны 1996 шықәсазы, Ҭырқәтәыла ақалақь Стамбул Урыстәылеи, Украинеи, Балгариеи даҽа гәыԥҩык атәылақәеи рнапы аҵарҩит ақьаад Амшын еиқәа аиқәырхара иазку.
Ари еиԥш иҟоу адокумент адкылара хымԥадатәны иҟалеит, Амшын еиқәа иҷыдоу аԥсабаратә еилазаара ашәарҭара иахьҭагылаз аҟнытә.
