АҞӘА, абҵ 21 – Sputnik. Аԥсны ар иамоу ауадаҩрақәа рыӡбараҿы Урыстәылеи Аԥсни реиқәшаҳаҭра ҿыц ацхыраара ҟанаҵоит, иҳәеит Аԥсны Ахада Рауль Ҳаџьымба Гәдоуҭатәи ахысратә архәҭа дахьаҭааз.
"Ҳара ҳар азыҟаҵазар ауп, бџьарлагьы еиқәыршәазар ауп. Ари ахықәкы зегь раԥхьа игылоуп ҳара ҳзы, избанзар Қырҭтәылеи ҳареи аҭынчраз аиқәшаҳаҭра ҳамам", — иҳәеит Рауль Ҳаџьымба.
Аԥсны Ахада инаҵшьны иазгәеиҭеит, Ареспублика архәҭақәа зегьы рҭагылазаашьа шеиԥшу, аха аибашьра ашьҭахь иҟаз аҭагылазаашьа иаҿырԥшны ҳахәаԥшуазар, акыр ишеиӷьу.
Рауль Ҳаџьымба иҳәеит арратә техника реиҭашьақәыргылараз аусмҩаԥгатәқәа шаҭаху, насгьы, аррамаҵура иахысуа рҭагылазаашьа шеиӷьтәтәу.
