АҞӘА, ԥхҷ 15 – Sputnik, Саид Барганџьиа. Иаанкылараан ахысра ҟазҵаз ихы иақәиҭтәра агәынамӡара рызцәырнагеит Ҭҟәарчал ауаажәлар, лҳәеит араион Ахада Аида Чачхалиа.
"Уажәшьҭа иаазгәаԥхалак зегьы аҩнуҵҟатәи аусқәа русзуҩцәа иреихсыр ауама?" — азҵаара лызцәырҵуеит Чачхалиа.
Ҭҟәарчал Ахада лгәаанагарала Арсен Ломиа ихы иақәиҭтәра иахҟьаны егьырҭ ацәгьоуцәагьы рхы иаҭәаршьалар ауеит аҩнуҵҟатәи аусқәа русзуҩцәа рганахьала ақәымчра аарԥшра.
Ҭҟәарчалаа Апрокуратура хадахьы ааԥхьара ҟанаҵоит Арсен Ломиа иус еиҭахәаԥшырц, мап анакәха Ҭҟәарчал ауаажәлар аҳәара ҟарҵоит Апрокурор хада иамхразы.
Ԥхынҷкәын жәба рзы Апрокуратура хада аусҭҵааратә усбарҭа Арсен Ломиа иганахьала ашьауӷатә ус хацнаркит. Уи ажәҩан ахь ахысрала иааникыларц иҭахын иара иаанкылараз ишьҭаз аҩнуҵҟатәи аусқәа русуаҩцәа.
