ГӘДОУҬА, ԥхҷ 29 — Sputnik, Рада Ажьиԥҳа. Гәдоуҭатәи Очамчыратәи автоинспекциақәа русзуҩцәа Гәдоуҭа араион аҩнуҵҟа ареидқәа еицымҩаԥыргеит. Апрофилактикатә усурақәа ззынархаз амҩатә ԥҟарақәа еилазго, арыжәтә ыжәны аԥсҟы зкуа амашьына арныҟәцаҩцәа рахьырхәреи, иара убас, егьырҭ азакәанеилагарақәа рҿагылареи ракәын, иҳәеит Гәдоуҭа араион апрокурор Нури Ҭаниа.
Приморсктәи Бамборатәи аԥыԥшырҭақәа рҟны ареид ԥшь-сааҭк инарзынаԥшуа ицон, уи аамҭа иалагӡаны еиуеиԥшым аилагарақәа ыҟан. Автоинспекциа аусзуҩцәа иааныркылеит арыжәтә ыжәны иҟаз ԥшьҩык, амашьына аныҟәцараз аршаҳаҭга змамыз ԥшьҩык, амҩатә ԥҟарақәа аилагаҩцәа фҩык, егьырҭ – 32-ҩык.
"Ас еиԥш аиҭанеиааира, аусеицура ҳапрактикаҿ есымша иҟан, иӷәӷәоу агәаҭарақәа алҵшәа рмоур залшом", – иҳәеит Очамчыратәи аинспектор Витали Осиа.
"2014 шықәса иалагӡаны араион аҟны 123 амҩатә машәыр ҟалеит, уааԥсырала иҭахеит 19-ҩык, ари астатистика еиҳа-еиҳа изҳауеит, амчратә усбарҭақәа русура еиӷьымхар", – ҳәа азгәеиҭеит Гәдоуҭа араион апрокурор Нури Ҭаниа.
Аҳәынҭқарратә автоинспекциа аусзуҩцәа ргәаҭарақәа ирылахәын Гәдоуҭа араион анапхгара, Аԥсны аҩнуҵҟатәи аусқәа рзы аминистрра Гәдоуҭатәи аҟәша аиҳабыра, абыргцәа рхеилак ахаҭарнакцәа.
