АҞӘА, ажь 26 — Sputnik. Урыстәылатәи Афедерациа Аҭагылазаашьа ҷыдақәа рзы аминистрра Донбассҟа ашьҭразы иазнархиоит агуманитартә цхыраара ҿыц ажьырныҳәа 27 рзы, иҳәеит аминистрра аинформациатә усбарҭа ахаҭарнак. Абри атәы аанацҳауеит РИА Новости.
"Амза ҩажәеи быжьба, ашьыжь асааҭ фба рзы Ногинсктәи аиқәырхаратә центр аҟнытә Донецки Лугански ирықәынхо ауааԥсыра рзы анаҩстәи агуманитартә цхыраара шьҭхоит", — иҳәеит аминистрра ахаҭарнак.
Иааидкыланы Урыстәыла Добассҟа иашьҭхьеит 13,4 ныз.кь тонна агуманитартә цхыраара — уахь иаҵанакуеит афатә, ажәтә, амаҭәа ԥхақәа, агенераторқәа уҳәа аԥсҭазааразы иаҭаху амаҭәаҳәқәа жәпакы.
Украина аиҳабыра иаҳхысыз ашықәс мшаԥымзазы атәыла мрагыларатәи ахәҭаҿы абџьармчы рхы иадырхәо иалагеит аҳәынҭқарратә мчра аԥсахра иаҿагылаз рганахьала. ООН аҵыхәтәанытәи адыррақәа рыла, аконфликт аҟны иҭахахьеит 4,7 нызқьҩык ауааԥсыра, 10 нызқьҩык ахәрақәа роуит. Ԥхынҷкәын 9 инаркны аибашьра аанкыларазы аиқәшаҳаҭра аус ауеит ҳәа иԥхьаӡоуп, аха аганқәа акырынтә уи аиқәшаҳаҭра шеиларгахьоу азы ахарақәа рыдеибаҵоит.
Аԥснынтә Донбассҟа агуманитартә цхыраара шьҭын иаҳхысыз ашықәс ԥхынҷкәын 26 рзы.
