АҞӘА, жәб 11 – Sputnik, Роберт Џьопуа. Кәыдры аӡиас анхыҵлак Гәылрыԥшь араион иатәу Кациқыҭ ауааԥсыра аԥхасҭа ду рнаҭар ауеит ҳәа Sputnik акорреспондент адырра ииҭеит Аекологиеи аԥсабарахьчареи рзы аҳәынҭқарратә еилакы ахантәаҩы ихаҭыԥуаҩ Мурман Соломко.
Соломко излазгәеиҭаз ала, Кәыдры аӡиас ахыҵразы еиҳа иахьшәарҭоу аҭыԥқәа рҿы иахьа аҭҵаарақәа мҩаԥысуеит.
"Аҭҵаарақәа рымҩаԥгараан ҳара иҳаԥхьаӡеит ишәарҭоу аҭыԥқәа ахьынӡанаӡо", – иҳәеит Мурман Соломко.
Кәыдры ааԥынразы ианхыҵуаз изныкымкәа Кациқыҭ ауааԥсыра аԥхасҭа рнаҭахьан. Ақыҭа ахада Борис Торосиан иажәақәа рыла, аӡы иахьа ма уаҵәы ихыҵыр алшоит, уи аныҟало уздырӡом.
"Аӡиас шьҭыҵыр алшоит ааԥын ашьхара асы аныӡҭуа адагьы ақәыршыҩ анауагьы. Усҟан аҩнқәеи аарыхрақәеи аӡы рылалар алшоит", – иҳәеит Борис Торосиан.
Аӡиас Кәыдры ҭызҵаауа Аҳәынҭқарратә екологиатә комитет азҵаара аӡбара азы ихымԥадатәиу абжьагарақәа ҟанаҵеит: аура 6 километрки, аҭбаара 200 метреи, аҵаулара 3 метраки иҟоу аӡышьҭра арыцқьара, уи аҭыԥ аҟны 500 нызқь кубометр иҟоу аинерттә материал алгара, аӡиас арыӷьатә ган аҟны 4 метрак иҟоу иҭазкша аихагылара аҟаҵара.
