СУХУМ, жәб 12 – Sputnik, Бадраҟ Аҩӡба. Аԥсны азинмчранагӡа змоу Приднестровска Молдавиатә Аҳәынҭқарра ахаҭарнак Александр Ватаман адәныҟатәи аусқәа рминистр Нина Штански Аԥсни Приднестровиеи акультуратә, аҵарадырратә, ақыҭанхамҩатә, аҩнуҵҟатәи аусқәа, аҿартә политикеи аспорти рзы аусеицура иалацәажәеит, абри атәы иаанацҳауеит Аԥсны Адәныҟатәи аусқәа рминистрра.
"2015 шықәсазы аҩтәылак реизыҟазаашьақәа рзы иактуалтәу ахырхарҭақәа алкаан. Арҭ ахырхарҭақәа рахь иаҵанакуеит адәныҟатәи аусқәа рминистрра, акультура аминистрра, аҵарадырра, ақыҭанхамҩа, аҩнуҵҟатәи аусқәа, аҿар рполитикеи аспорти русеицура", – абри атәы аагоуп адәныҟатәи аусқәа рминистрра аацҳамҭаҟны.
Аиԥылара аламҭалаз еилахәу ателехәаԥшратә проектқәа раԥҵара атәы еибырҳәон. Иара убас Аԥсни Приднестровиеи руниверситетқәа русеицура иалацәажәон.
Аԥсны азинмчранагӡа змоу Приднестровска Молдавиатә Аҳәынҭқарра ахаҭарнак Александр Ватаман Аԥсны адәныҟатәи асуқәа рминистр Виачеслав Чрыкба ихьӡ ала Нина Штански адипломатиатә маҵзура аусзуҩы имш лыдиныҳәалеит, лус аҟны ақәҿиарақәа лзеиӷьишьеит.
Аԥсны аҳәынҭқарра Ахада 2007 шықәсазы Александр Ватаман Аԥсны азинмчранагӡа змоу Приднестровска Молдавиатә Аҳәынҭқарра аҟны хаҭарнакс дҟаҵан.
