АҞӘА, жәб 27 – Sputnik, Анастасиа Никонова. Змаҵуратә уалԥшьақәа ззынамыгӡо аҳақьым хадацәа лаҵарамзазы русурақәа ирымххоит, иҳәеит Агәабзиарахьчара аминистр Андзор Гоов ахәашаҽны имҩаԥигаз аусуратә еилатәараҿы.
"Ԥшьымз раԥхьа аҳақьым хадацәеи, иааидкыланы ахәышәтәырҭа амедицинатә персонал зегьы русура аиӷьтәразы абжьагарақәа ҟаҳҵеит. Аха урҭ ирықәныҟәаз маҷуп", – иҳәеит Гоов.
Аминистр иажәақәа рыла, амедицинатә усбарҭақәа рыбжьара иахәҭоу аимадара шьақәыргылаӡам. Агәабзиарахьчара аминистррахь ацхыраара иаҳәарц иадҵаало ауааԥсыра есҽны рхыԥхьаӡара иацлоит, ҳәа азгәеиҭеит иара.
"Ауаа рыпроблемақәа раӷьырак ахәышәтәырҭақәа рҟны иуӡбаратәы иҟоуп. Аха ус изыҟамлеит", – иҳәеит аминистр аҳақьым хадацәа рахь ихы нарханы.
Аԥсны ареспубликатә хәышәтәырҭа аҳақьым хада Асҭамыр Иуанба игәы иаланы иҳәеит уажә ааигәа ачымазаҩ дызҭаз ацхыраара лас амашьына Ԥсоу аҳәааҿы х-сааҭк инарзынаԥшуа ишгылаз, ари аҩыза ахҭысқәа уажәаԥхьагьы ишыҟалахьаз. Аминистр Андзор Гоов ажәа риҭеит ари апроблема шаӡбахо азы.
Анаҩс аиԥылара ажурналистцәа аламырхәӡакәа имҩаԥысит.
