АҞӘА, хәжәк 10 – Sputnik. Америка ахахьы аагара ацәыцәгьоуп Украина аҭынчратә процесс азы аӡбара дара рыда иахьрыдыркылаз. Убри аҟнытә минсктәи аиҿцәажәарақәа рылҵшәақәа еицаркырц иашьҭоуп, ҳәа иԥхьаӡоит Урыстәыла Аҳәынҭқарратә дума аспикер Сергеи Нарышкин. Абри атәы аанацҳауеит РИА Новости.
Нарышкин игәаанагарала, минсктәи аиқәшаҳаҭра агәыӷра ацуп аибашьра аанкылахоит, Донбасс аҭынч ԥсҭазаара ҟалоит ҳәа. Аиқәшаҳаҭра аҵакы еиҳахеит ООН ашәарҭадаратә хеилак адгылара аназнауы. Аха аибашьра зынӡа аанкылара аҟынӡа макьана ихароуп ҳәа игәы иаанагоит Нарышкин.
"Российская газета" аҟны иикьыԥхьыз астатиаҟны излазгәаиҭо ала, адунеи азы ашәарҭара ахьынтәаауа еиҭах аокеан-нырцәынтәи ауп избанзар европаа Америка аҵаҳәарада Украинатәи акризис аӡбара рхы аладырхәит, уи иахҟьаны Америка аҭынҷратә процесс иалхәдаахеит".
Украинатәи акризис аӡбаразы минсктәи аиҿцәажәарақәа мҩаԥысит жәабран 12 рзы. Уи алҵшәақәа рыла иазгәаҭан Донбасс аибашьра аанкылара, иара убас арбџьар хьанҭақәа аидыслара аҭыԥқәа рҟынтәи ралгара.
