АҞӘА, хәжәк 16 – Sputnik. Венесуела ахада Николас Мадуро амҽыша алаҳәара ҟаиҵеит Америка иаларгалаз асанкциақәа раԥыхразы анапаҵаҩрақәа реизгара ишалаго. Абри атәы аанацҳауеит РИА Новости.
Иҳаҩсыз ашәахьаҽны Барак Обама инапы зҵаиҩыз ақәҵара инақәыршәаны, Венесуела аганахьала аҭагылазаашьа ҷыда алагалоуп, избанзар уи игәаанагарала атәыла Америкзы ишәарҭоуп. Ақәҵара излаҳәо ала Венесуела ачынуаа быжьҩык рганахьала асанкциақәа алагалан.
"Сара Америка атәылауаа рахь ашәҟәы насышьҭуеит. Ара ҳара ҳҿы ауаажәлар рацәаны иахьнеиуа аҭыԥқәа рҟны ауаа нашьҭны 10-миллионҩык ауааԥсыра рнапы аҵарҩыртә иҟаҳҵоит. Обама, уимпериалисттә санкциақәа наҟ иаԥых", — иҳәеит Мадуро, англыз бызшәлагьы еиҭеиҳәеит.
Венесуела ахада иажәақәа рыла, ари аус егьырҭ атәылақәа рҟныгьы имҩаԥысуеит.
