АҞӘА, хәжәк 20 — Sputnik, Анастасиа Никонова. Аԥсны абизнес аиҿкаара згәиҭоу рзы алшарақәеи, аҭагылазаашьақәеи маншәалоуп, абри атәы Аԥсны "Аинвестициатә ҿиара агентра" адиректор хада Гурам Делба Sputnik акорреспондент иаиҳәеит.
Иара иажәақәа рыла, урыстәылатәи абизнесменцәа рԥылара – Урыстәыла ахьчаратә агентра 2014 шықәса, ԥхынҷкәынмзазы амч зауз аиқәшаҳаҭра аҳәаа иҭагӡаны аусура ацҵара иацхраауеит.
"Аиқәшаҳаҭра ҳнапы аҵаҳаҩижьҭеи ԥшьы-мыз ҵуеит, аха ҳара аинвестициатә проектқәа ҳарҿиахьеит, акомпаниа "Репруа" азы абитонтә зауадқәеи, аргыларатә маҭәахәқәеи риуразы ацхыраара уахь иналаҵаны", – иазгәеиҭеит Делба.
Уажәазы, Делба иажәақәа рыла, аинвестициатә ҿиара агентра аквапарки, асасааирҭатә комплекси Пицунда, акабельтә зауад Тҟәарчал аргылара апроектқәа ирыхәаԥшуеит.
Аԥсны абизнес иаԥырхагахаша абиуракратиа ыҟаӡм ҳәа игәы иаанагоит аиԥылара алахәыла, "Опора России" сахалинтәи аҟәша ахантәаҩы Иури Диаков.
"Аԥсны ацитрустә шәырӡ азауад аргылара ҳгәиҭоуп. Иара уи апроект Аҩадатәи Корееи Китаи абизнесменцәа аинвестициақәа аларҵоит", – иҳәеит Диаков.
Иара игәаанагарала, амшынтә ресурсқәа рхархәареи, аквакультура аҿиареи – аҳәынҭқаррахь аинвестициазы априоритет рымоуп.
Аиԥылара аҳәаа иҭагӡаны "Аԥсны аинвестициатә ҿиара агентреи" аилазаара "Опора России" аусеицуразы аиқәышаҳаҭра рыбжьарҵеит.
