ГАГРА, мшԥ 14 — Sputnik, Саида Жьиҧҳа. Валентина Тишьенко диит Гагра ақалақь, 1924 шықәсазы. 1942 шықәсазы Тишьенко Гагратәи авоенкомат ахь днеины афронт ахь дрышьҭырц дрыҳәеит. Аӡӷаб қәыҧш амедиаҳәшьа лкурсқәа дахырыҧхьаӡалеит, анаҩс аҧсшьарҭаҭыҧ "Челюскинцев" аҟны иаартыз арратә хәышәтәырҭаҟны аусура далагеит.
"Ихәыз асолдаҭцәа ҳзааргон. Имарианы ихәыз ирлас ршьапы иқәҳаргылон, анаҩс афронт ахь ихынҳәуан, ӷәӷәала ихәыз рыҧсеиқәырхара цәгьан, аамҭа рацәа аҭахын", — илгәалалыршәоит амедиаҳәшьа.
Аҧсшьарҭаҭыҧ "Челюскинцев" арратә хәышәтәырҭа аа-мза ракәын иахьаатыз, уи ашьҭахь ииаган ақалақьтә хәышәтәырҭахь.
"Ҳҳақьымцәа асолдаҭцәа рыҧсҭазаара иазықәҧон. Амедицинатә цхыраара адагьы рыҧсы еиқәхарц азы Анцәа ҳиҳәон", — еиҭалҳәон Тишьенко.
Валентина Тишьенко Гагратәи ахәышәтәырҭаҟны 1942 шықәса инаркны 2004 шықәсанӡа аус луан. Атыл аветеран Жуков имедаль, иара убас аиубилеитә медальқәеи ланашьоуп.
Аветеран Валентина Тишьенко Аџьынџьтәылатә еибашьра ду аветеранцәа Аиааира ду амш рыдылныҳәалеит.
