Ельвира Арсалиа: Аԥсны адунеитә культурахь алагала ду ҟанаҵеит

© Sputnik / Илона ХварцкияЗрительный зал драмтеатра. Архивное фото.
Зрительный зал драмтеатра. Архивное фото. - Sputnik Аҧсны
Анапаҵаҩра
Мшаԥымза 15 рзы иазгәарҭеит Жәларбжьаратәи акультура амш.

АҞӘА, мшԥ 16 – Sputnik, Бадраҟ Аҩӡба. Аԥсны ахьӡала адунеитә культура алагала ҟарҵеит XX ашәышықәса алагамҭазы Европа зыхьӡ акыр инаҩхьаз Александр Шервашиӡе-Чачба, адунеи аҟны еицырдыруа иҟалаз ашәаҳәаҩ Хьыбла Гьерзмааԥҳа, Аԥсны ахьыӡ ҭызгаз ашәҟәыҩҩы Фазиль Искандер, лҳәеит акультуреи аҭоурыхтә-культуратә ҭынха ахьчареи рминистр Ельвира Арсалиа.

Ельвира Арсалиа иазгәалҭеит амилаҭтә культура аиқәырхара аҵак ду шамоу.

"Иарбан милаҭзаалак ркультура уникалтәуп, ажәларқәа зегьы, аиҳарак ҳара ҳаиԥш зхыԥхьаӡара маҷу хықәкы хадас ирымоуп рмилаҭтә культура аиқәырхара", — лҳәеит Арсалиа.

Ельвира Арсалиа иазгәалҭеит ҳаԥхьаҟа Жәларбжьаратәи акультура амш аҽны ишазгәаҭоу акультура аусзуҩцәа реиԥылара аиҿкаара, уаҟа акультура аҿиара азҵаарақәа ишырзааҭгылахо.

"Ҳаԥхьаҟа еиҿкаазар ауеит акультура аусуаҩцәа злахәу аиԥыларақәа, уаҟа акультура аҿиара иазку азҵаарақәа ирзааҭгылахоит. Ас еиԥш иҟоу аиԥыларақәа традицианы иҟаҵазар ауеит", — лҳәеит аминистр.

Жәларбжьаратәи акультура амш аламҭалазы сынтәа Аԥсны имҩаԥган Фазиль Искандер изкыз афестиваль "Ауаҩы игыларҭа", ҳәа хьӡыс изоуз, уи аусмҩаԥгатә Аԥсны акультуратә ԥсҭазаараҿы азҿлымҳара ду аманы имҩаԥысит.

Жәларбжьаратәи акультура амш азгәарҭоит 1998 шықәса инаркны акуаажәларратә еиҿкаара "Акультура ахьчараз Жәларбжьаратәи алига" ажәалагала ала.

Адунеизегьтәи акультура амш азгәаҭараз раԥхьаӡа акәны ажәалагала ҟеиҵеит Урыстәылеи адунеи зегь акультуреи аҿы зыхьӡ еицырдыруа асахьаҭыхҩы Николаи Рерих 1931 шықәсазы Бельгиа имҩаԥысуаз акультуратә ҭынха аиқәырхара иазкыз аконференциа аҟны. Рерих агәра ганы дыҟан акультура ажәларқәа реизааигәара иацхраауеит, ауаҩы деиӷьны дҟанаҵоит ҳәа.

Ажәабжьқәа зегьы
0