АҞӘА, мшԥ 21 – Sputnik, Астанда Арӡынба. Рауль Ҳаџьымба Женеватәи аиԥыларақәа реицхантәаҩцәа дырԥылеит, аиԥылараҟны аганқәа Женеватәи аиԥыларақәа рымҩаԥгашьа иара убас агуманитартә темала Аԥсни Еидҵоу Амилаҭқәа Реилазаареи русеицура иалацәажәеит.
Женеватәи аиԥыларақәа рыҟны Еидҵоу Амилаҭқәа Реилазаара амаӡаныҟәгаҩ хада Анти Турунен Женева имҩаԥысуа аилацәажәара аҵак ду шамоу атәы азгәеиҭеит, иара убас Женеватәи аиԥыларақәа рҳәаақәа ирҭгӡаны аиԥыларақәа рыцҵара оптимизмла дшахәаԥшуа атәы ациҵеит.
"Аилацәажәарақәа раан ицәырҵуа ицәгьоу аҭагылазаашьақәеи, азҵаарақәеи шыҟоугьы, урҭ еиҳарак аполитикатә моментқәа роуп изхьысуа, ус ишыҟоугьы аиҿцәарақәа рыҟны апрогресс убартә иҟоуп", – иҳәеит Турунен.
Еидҵоу Амилаҭқәа Реилазаара Аԥсны агәабзиарахьчаратә, аҵардырратә, акультуратә ҭынха ахьчара рзы ацхыраара аҭара иақәшаҳаҭуп, азгәеиҭеит Турунен. Иара игәаанагарала анаҩстәи арҭ ахырхарҭақәа рыла аиԥыларақәа Женеватәи аиԥыларақәа рҳәааҟны имҩаԥгалатәуп.
Аԥсны ахада рауль Ҳаџьымба Женеватәи аиԥыларақәа рҳәаа иҭагӡаны имҩаԥысуа аусқәа Аԥсназы аҵакы шрымоу атәы дазааҭгылеит, иара убас иациҵеит апрактикатә лҵшәақәа шаарго атәы.
"Қырҭтәылатәи аган еилкааны иамазароуп шьҭахьҟа ахынҳәра ҟалашьа шамам", – иазгәеиҭеит Ҳаџьымба.
Аахыҵ Кавказ ашәарҭадараеи аҭышәныртәалареи рзы Женеватәи аиҿцәажәарақәа XXXII-тәи араунд мҩаԥысуеит рашәара 30 инаркны ԥхынгәы 1-нӡа.
