АҞӘА, мшԥ 23 – Sputnik, Асҭанда Арӡынԥҳа. Раԥхьаӡа акәны Шәачантәи амузыкант Гегам Григориан аԥсуа филормониа асценаҟны дықәгылеит, адудукарҳәаҩа аиарман музыка, еицырдыруа акомпозитор Арам Сатиан иаԥҵамҭа "1915" наигӡеит.
"Агеноцид – трагедиа дууп аиарманжәлар зегь рзы. Ари илахьеиқәҵагоу арыцхә сџьынџьуаа тәылас иахьыҟазаалакгьы иазгәарҭоит. Иҭахаз ҳгәалашәоит, иаҳҭахуп атәылақәа зегьы аполитикатә аспектқәа ирызхьамԥшкәа харада ишьыз ауаа ргәаладыршәарц", – иҳәеит амузыкант Григориан.
Ермантәыла зҽаԥсазтәыз артист, ақалақь Шәача афилормониа асолист Гегам Григориан Аҟәа иқәгылара мҩаԥысит аиарманцәа рхырҵәара шәы-шықәса ахыҵра иазку акамертә музыка аконцерт аҳәаақәа ирҭагӡаны.
Агәалашәаратә концерт иалахәын адирижиор Давид Терзиан напхгара ззиуа Аԥсны Аҳәынҭқарратә оркестр, иара убас Ермантәыла атеатри аопереи аҳәынҭқарратә академиа асолистка Сирануш Гаспариан.
