ГАЛ, мшԥ 25 – Sputnik, Алиас Корсаиа. Имаҵуратә уалԥшьақәа рынагӡараан иҭахаз Аԥсны Аҳәынҭқарра аҟны иҟоу Урыстәыла Афедералтә шәарҭадаратә хеилак аҳәаахьчаратә напхгара ааиҳабы, подполковник Васили Квитко ихьӡала амини-футбол азы ачемпионат афиналтә хәҭа хыркәшоуп Гал ақалақь аҟны.
Амш шыцәгьазгьы ахәмарра афиналтә хәҭа ухнахыртә иҟан. Априз хадазы афиналтә матч аҟны ақалақь Гал аҳәаахьчаратә хәҭа аҟынтә аизгеи Аҟәа ақалақь анапхгареи еиҿагылеит. 2:1 – ҳәа иаиааит Гал еизгоу агәыԥ. Ахԥатәи аҭыԥ ааннакылеит Очамчыра ақалақь аҳәаахьчаратә катерқәа адивизион акоманда.
Ачемпионат мшаԥы 2 рзы иалагеит. Алхратә матчқәа еиуеиԥшым аҳәаахьчаратә усбарҭақәа рыхәҭақәа рыҟны имҩаԥган. афиналтә хәҭахьы хә-гәыԥк алалеит. Васили Квитко дыргәаладыршәарц азы афиналтә хәмаррахь аспортсменцәа рыдагьы имҩахыҵит Аԥсны ақалақьқәа рыҟны аус зуа аҳәаахьчаратә напхгарақәа рхаҭарнакцәагьы.
"Васили Квитко игәалашәаразы ауснагӡатәқәа рымҩаԥгара планс иҳамоуп. Имҩаԥаҳгаз амини-футбол азы атурнир урҭ ирхыԥхьаӡалоуп", – аҳамҭақәа ранашьара ашьҭахь иҳәеит ахәаахьчаратә усбарҭа апресс-маӡаныҟәгаҩ Сергеи Огнев.
Ачемпионат анҵәамҭазы атурнир алахәылацәа Васили Квитко имемориалтә ӷәы иадгыланы афотосахьа ҟарҵеит. Иаиааиз агәыԥқәа реиҳабацәа иранашьан ахраҿақәеи аҳаҭыртә бӷьыцқәеи атурнир рҽахьаладырхәыз азы.
