АҞӘА, мшԥ 27 — Sputnik. Аԥсны ахада Рауль Ҳаџьымба усуратә визитла Ҟарачы-Черкессктәи Ареспублика даҭаауеит, ҳәа аанацҳауеит ахада иофициалтә саит.
Аԥсны ахада иофициалтә саит аҟны иарбоу аинформациа ала, аҭаара иалагӡаны иазгәаҭоуп Ареспублика ахада Рашьыҭ Темерзоев иԥылара, иара убас аиҳабыра ахаҭарнакцәеи, Ҟарачы-Черкессктәи апарламент адепутатцәеи, Аԥсны жәлар рџьынџьтәылатә еибашьра аветеранцәеи, иҭахаз аибашьцәа рҭаацәарақәеи, ауаажәларреи рԥылара.
Рауль Ҳаџьымба ицны аҭаара рхы аладырхәуеит Аԥсны Ашәарҭадаратә хеилак амаӡаныҟәгаҩ Муҳамед Кьылба, Амилаҭтә олимпиатә еилакы аиҳабы Валери Аршба, Адунеизегьтәи аԥсуа-абаза конгресс аиҳабы Геннади Аламиа, иара убас Хьрыԥс Џьапуа.
Аԥсны ахада Рауль Ҳаџьымба Ҟарачы-Черкесскҟа иусуратә аҭаара мҩаԥысуеит ҳазҭоу ашықәс, мшаԥы 28-29 рзы.
