ГАГРА, мшԥ 29 – Sputnik, Саида Жьиԥҳа. Гагра араион аҵара аҟәшеи арҵаҩцәа рыпрофсоиуз акомитети Аџьынџьтәылатә еибашьраҿы аиааира 70 шықәса ахыҵра иазкны аплан шьақәдыргылеит. Аусмҩаԥгатәқәа ирылан иара убас, арҵаҩцәеи аҵаҩцәеи Гагратәи Акультура ахан аҟны концертк аҿы реицықәгылара.
Арҵаҩратә коллективқәеи аҵаҩцәеи ҭакԥхықәрала иазнеит ари аусмҩаԥгатә.
Ашколқәа рхаҭарнакцәа инарыгӡеит арратә-патриоттә ашәақәа, ажәеинраалақәа ирыԥхьеит, асценкақәа ықәдыргылеит, акәашарақәа нарыгӡеит.
Аконцерт алахәцәа ари амш азы амаҭәа ҷыда рӡахит. Урҭ раԥхьа рабдуцәеи, урҭ рабацәеи рорденқәеи рмедальқәеи раԥхьа икыдырҵеит.
"Арҵаҩцәеи аҵаҩцәеи сценак аҟны реицықәыргылара ҳҭахижьҭеи акыр ҵуан. Аџьынџьтәылатәи еибашьраҿы Аиааира 70 шықәса аҵра аламҭалазы ари агәҭакы нагӡахеит. Иахьа раԥхьаӡа акәны ҳара иаабоит арҵаҩцәа рҵаҩцәа рываргыланы сценак аҟны ишықәгыло. Арҵаҩцәеи аҵаҩцәеи рымчқәа еилаҵаны аибашьра аамҭахь ҳдыргьежьит, ҳаиҳабацәа ирхыргаз аилкаара ҳарҭеит", — лҳәеит Гагра араион аҵара аҟәшеи арҵаҩцәа рыпрофсоиуз акомитет аиҳабы Марина Богаева.
Ас еиԥш иҟоу аусмҩаԥгатәқәа аҿар аԥсадгьыл абзиабара рыланааӡоит.
"Ҳара гәахәарыла ари агәалашәаратә усмҩаԥгатә ҳҽалаҳархәит. Иахьатәи аконцерт иаҳнарбеит арҵаҩцәеи аҵаҩцәеи аурокқәа рҟны мацара шакәым иахьаку", — лҳәеит арҵаҩы Саида Цәышԥҳа.
Арҵаҩцәеи аҵаҩцәеи концертк аҟны рықәгылара мҩаԥган раԥхьаӡа акәны.
Аусмҩаԥгатә ахь ааԥхьара рыҭан Аџьынџьтәылатә еибашьра ду аветеранцәа.
