АҞӘА, мшԥ 29 – Sputnik, Роберт Џьопуа. Аџьынџьтәылатә еибашьра ду аҿы Аиааира агара 70 шықәса ахыҵра иазку апарад аҽалархҽразы аҽазыҟаҵарақәа мҩаԥнагеит Урыстәыла абыжьбатәи арратә база. Абри атәы ааицҳаит арратә база акомандаҟаҵаҩ ихаҭыԥуаҩ Иури Пошьенко.
"Аҟәа имҩаԥысуа апарад рхы аладырхәуеит 35-ҩык аруаа, хҩык акомандаҟаҵара иалалоит", — иҳәеит Пошьенко.
Урыстәыла абыжьбатәи арратә база акомандаҟаҵаҩ ихаҭыԥуаҩ иажәақәа рыла, аҽазыҟаҵарақәа есыҽны имҩаԥысуеит.
"Аҽазыҟаҵарақәа рҟны зегьы шьаҿеиқәшәала рныҟәара азҿлымҳара аҳҭоит. Аруаа цәаҳәак ианыланы инеиуазар ауп", — азгәеиҭеит Пошьенко.
Урыстәыла абыжьбатәи арратә базеи, Аԥсны Арбџьармчқәеи, Урыстәыла аҳәаахьчаратә усбарҭеи Аџьынџьтәылатә еибашьра ду аҿы Аиааира агара 70 шықәса ахыҵра иазку апарад аҽалархҽразы аҽазыҟаҵарақәа ирылагеит Аҟәа, мшаԥымза 24 рзы.
Аҽазыҟаҵарақәа лаҵарамза 5-нӡа имҩаԥыслоит, лаҵарамза 7 рзы агенералтә ҽазыҟаҵара мҩаԥгахоит. Аиааира апарад мҩаԥысуеит лаҵарамза 9 рзы, Идырым асолдаҭ ибаҟа аҿаԥхьа.
