АҞӘА, лаҵ 6 – Sputnik, Астанда Арӡынԥҳа. Урыстәылатәи Афедерациеи Аԥсны Аҳәынҭқарреи ирыбжьоу Аԥсны иқәынхо Урыстәыла атәылауаа тәанчахәыла реиқәыршәаразы аиқәшаҳаҭра Апарламент асессиаҿы адепутатцәа зегьы еицҿакны иақәшаҳаҭхеит.
Аусеицуреи астратегиатә еиҩызареи рзы ҩ-тәылак ирыбжьоу аиқәшаҳаҭра инақәыршәаны, 2015 шықәса ажьырныҳәа 1 инаркны Аԥсны иқәынхо Урыстәылатәи Афедерациа атәылауаа етап-етапла ртәанчаҩхәы иацырҵоит, ҳәа азгәеиҭеит Апарламент аҿы ахада ихаҭарнак Дмитри Шамба.
Иара иажәақәа рыла, Аԥсни Урыстәылеи уи ахырхарҭала аус зуа аусбарҭақәа рминистрцәа рнапы зҵарҩыз Аиқәшаҳаҭра ала Аԥсни Урыстәылеи атәылауаа ртәанчаҩхәы Аладатәи афедералтә округ аҟны 10 нызқь 179 мааҭ рҟынӡа инаӡо атәанчаҩхәы иақәшәоит.
"Урыстәыла атәылауаҩра зманы Аԥсны иқәынхо ауааԥсыра иарбоу атәанчаҩхәы аиҳа еиҵны ироур, аиҭаԥхьаӡара ҟалоит, нас урҭ ԥарақәа хы-шықәса ирҭагӡаны ишәазаауеит", – азгәеиҭеит Дмитри Шамба.
Шамба излаиҳәо ала, иааизакны Аԥсны атәылауаа урыстәылатәи атәанчахәы зауа рхыԥхьаӡара 32 нызқьи 154-ҩык рҟынӡа инаӡоит. Иахьа уажәраанӡа ртәанчахәы 6 нызқь мааҭ рҟынӡа инаӡоит.
Дмитри Шамба иазгәеиҭеит иара убас, Аиқәшаҳаҭра анапаҵаҩра ҟалаанӡа, атәанчахәы ахыԥхьаӡаларазы аусура астаж 1991 шықәсанӡа шакәыз иадрбахоз, уажәшьҭарнахыс — 2012 шықәсанӡа.
Жәлар Реизара ахантәаҩы Валери Бганба иажәақәа рыла, иаагоу Аиқәшаҳаҭра Аԥсны Аҳәынҭқарра атәылауаа тәанчахәыла реиқәыршәара иадҳәалаӡам, аҳәынҭқарра атәанчахәытә афонд аԥара еизҳалоит ҳәа.
