АҞӘА, лаҵ 6 – Sputnik, Анжелика Бениаԥҳа. Ажәахәқәа рконкурс "Аԥсны аҭоурых аҟны Владислав Арӡынба ироль" аҟны аиааира згаз еилкаауп.
Ажиури алахәцәа: Аԥсуа-абаза конгресс аиҳабы Геннади Аламиа, аҭоурыхтә факультет адекан Алик Габелиа, аҭоурыхҭҵааҩцәа Руслан Барцыци Аслан Аҩӡбеи аиааира згаз ажәахәқәа шьақәдыргылеит.
Актәи аҭып аанылкылеит Наала Аҩӡԥҳа, аҩбатәи еицеиҩыршеит аспирант Аслан Габелаиеи Аԥснытәи аҳәынҭқарратә университет астудентка Нала Аргәынԥҳаи, ахԥатәи аҭып иаԥсахеит ААУ астудентка Сусана Папазиани аспирант Елана Гьегьиаԥҳаи.
Аицлабра аҟны аиааира згаз Москватәи ақалақьтә анапхгараҭаратә университет аушьҭымҭа Наала Аҩӡԥҳа лажәахә аҟны дазааҭгылеит Владислав Арӡынба дипломатк иаҳасаб ала ироль.
"Адипломатцәа русура даара имариам. Владислав Арӡынба дипломатк иаҳасаб ала уаҩ илымшара илиршеит. Аибашьра ашьҭахьтәи ашықәсқәа раан Аԥсны адунеи аҟны адгылаҩ дамамызт. Аха уи ахьыӡ ҭызгоз адипломат даман", — лҳәеит Наала Аҩӡԥҳа.
Аҿартә политиказы Аҳәынҭқарратә комитет аиҳабы Алиас Аҩӡба иазгәеиҭеит аконкурс аҿар маҷымкәа ишеиднакылаз.
"Аконкурс шыҟало атәы мызкы аԥхьа ирылаҳәан. Мызкы иалагӡаны ҳара ҳахь иааит 40 усумҭа. Урҭ рахьтә ҳаспециалистцәа хә-жәахәык алыркааит", — азгәеиҭеит Алиас Аҩӡба.
Уи иажәақәа рыла, апроект хықәкыс иамоуп аҿар рҭоурых ахь рхьарԥшра.
"Владислав Арӡынба изкны иҳәоу ианҵоу маҷым. Ҳара ҳзы аинтерес аҵан аҿар рзыӡырҩрра, урҭ Владислав Арӡынба Аԥсны аҭоурых аҟны ироль ишахәаԥшуа аилкааразы", — иҳәеит Алиас Аҩӡба.
Ажәахәқәа рконкурс "Аԥсны аҭоурых аҟны Владислав Арӡынба ироль" мҩаԥган Владислав Арӡынба диижьҭеи 70 шықәса аҵра инамаданы.
