ГАГРА, лаҵ 20 – Sputnik, Саида Жьиԥҳа. Лаҵарамза аныҳәақәа рзы Риҵатәи аҳәырԥсарра аҭааит аԥсшьацәа маҷымкәа. Ҵыԥх уажәааны иҭиин ҩ-миллион мааҭ рыхә абилеҭқәа, сынтәа иҭиин 22966 билеҭ адуцәа рзы, ахәыҷқәа рзы 732 билеҭ. Уи 8 миллионки 111 нызқьи 300 мааҭ ҟанаҵеит.
Агәаҭара-аушьҭратә пункт аиҳабы Адамыр Ҭаниа иажәақәа рыла, уажәы аусурақәа цоит аушьҭратә пункт акәша-мыкәша арыцқьаразы.
"Ҩ-шлагбаумк ҳаргылеит. Иара убас, лаҵарамза 1 инаркны аусура иалагоит акассатә кабинақәа ҩба. Акассатә кабинақәа рҟны ишьақәыргылахоит авидеокамерақәа. Агәыӷра ҳамоуп агәаранқәа ҟамлап ҳәа. Сменак аҟны аус рулоит акассирцәа ҩыџьа", — иҳәеит Адамыр Ҭаниа.
Иазгәаҭатәуп, иара убас, Риҵатәи амилаҭтә ҳәырԥссарахь анеиразы абилеҭқәа рыхәқәа ԥсахра рмоуит, ҵыԥх еиԥш адуцәа рзы абилеҭ 350 мааҭ иаԥсоуп, 100 мааҭк иаԥсоуп ахәыҷқәа рбилеҭ, аа-шықәсанӡа зхыҵуа ахәыҷқәа хәыда-ԥсада инеиуеит.
Мшаԥымза 1 инаркны 30-нӡа Риҵатәи амилаҭтә ҳәырԥсарра иарҳаит 3 845 400 мааҭ.
