АҞӘА, лаҵ 26 — Sputnik, Анжелика Бениа. Аԥсны ахада Рауль Ҳаџьымба еицырдыруа аурыс сахьаҭыхҩы, аскульптор, Ҟабарда-Балкариа жәлар рсаахьаҭыхҩы Михаил Шемиакин диԥылеит.
Рауль Ҳаџьымба асахьаҭыхҩы "Бзиала шәаабеит!" ҳәа иаҳәо, Аԥсныҟа иаара крызҵазкуа ахҭыс шакәу азгәеиҭеит.
"Ҳаԥсадгьыл, ҳауаажәлар рзы згәы былуа ауаа рзы ҳгәы дууп, ҳашәқәа аартуп. Аҟазара амч дууп. Шәара шәеиԥш иҟоу ауаа дуқәа ҳаԥсадгьыл аҟны адкылара акыр иаԥсоуп ҳара ҳзы. Ҳауаажәлар шәҟазара рыдыркылп ҳәа сгәы иаанагоит. Ҳаԥхьаҟагьы ҳаиқәшәалап ҳәа сгәыӷуеит", – иазгәшеиҭеит ахада.
Асахьаҭыхҩы Михаил Шемиакин ишазгәеиҭаз ала иара Аԥсныҟа изныкымкәа даахьан.
"Раԥхьаӡа акәны Аԥсныҟа сааит 1961 шықәсазы. Ари адгьыл ауп счымазара аиааира исыцхрааз. Аԥсабара заҵәык шсыхәоз атәы снырит. Шықәсык инеиҳаны ашьхара сыҟан. Еиҭа Аԥсныҟа сахьааз сеигәырӷьоит. Сара схықәкы адунеи аҟны иӡырызго ссахьақәа Аԥсны рцәыргаракәӡам, 50-шықәса инеиԥынкыланы снапы злаку аус – арҵаратә центр араҟа аиҿкаароуп", – иҳәеит Шемиакин.
Иара иажәақәа рыла Аԥсны асахьаҭыхҩцәа ҿарацәа рыцхырааразы апрограмма аиҿкаара игәиҭоуп.
"Ҳауаажәларқәа иузеиҟәымҭхуа еиԥшьуп. Ҳаидгыланы ҳҭоурых, ахақәиҭра ҳазықәԥалароуп. Избан акәзар хьыԥшымрада изыҟалаӡом аҟазара, иҟамзар аҟазара иҟазааӡом амилаҭ аҭоурых", – иациҵеит асахьаҭыхҩы.
Асахьаҭыхҩы Михаил Шемиакин Аԥсны иҟазаара аҳәаақәа ирҭагӡаны Аҟәа имҩаԥгазаауеит апресс-конференциа, Аԥснытәи аҳәынҭқарратә университет аҟны алекциа, аԥсуа сахьаҭыхыҩцәа рԥылара, Аԥсны акультуратә ҭынха аобиектқәа рҭаара. Иара убас Аҟәа имҩаԥгазаауеит Михаил Шемиакин ицәыргақәҵа "Рисунки в стиле Дзен".
