АҞӘА, лаҵ 26 — Sputnik, Наала Аҩӡба. Аҟәа ахадара ахәаахәҭратә палаткақәа аԥшаҳәа аҟынтә ақалақь амҩақәа рахь рыиагара рыӡбеит, абри атәы аҳҭнықалақь ахада ихаҭыԥуаҩ Леон Кәарҷиа Sputnik акорреспондент иаиҳәеит.
"Аҟәа асезонтә хәаахәҭра аиҿкааразы, иара убас ақалақь ахадара абизнес ацхыраарази аԥшаҳәа иадҳәалоу амҩақәа рыҟны ахәаахәҭра аилыргара ҳаӡбеит, асезонтә хәаахәҭра аҭыԥ алаҳхит", – иҳәеит Леон Кәарҷиа.
Кәарҷиа иажәақәа рыла, ақалақь архитектура анапхгара аӡбарала асезонтә-дәылгаратә обиектқәа рзы Џьонуа, Воронов, Калмыков, Чачба, Имам Шамиль рымҩақәа алхын.
Аргылара архитектуратә хәҭа аиҳабы Ҭамара Лакрԥҳа ишазгәалҭаз ала, ахәаахәҭыҩцәа зегьы аԥшаҳәа иазааигәаны аҭыԥқәа ааныркылон, уи лара лажәақәа рыла проблема хадас иқәгылан. Уи аҭагылазаашьа арҽеиразы ажеребиовка мҩаԥган.
Леон Кәарҷиа иажәақәа рыла ажеребиовка акоррупциатә схемақәа рыцәхьаҵра иацхыраауеит.
"Амҩақәа рыҟны ахәаахәҭратә ҭыԥ ҿыцқәа рзылхзаауеит, ахәаахәҭыҩцәа рхатә номерқәа рымазаауеит. Уи аҩыза асхема ақалақь ахадара русура иацхыраауеит", – иазгәеиҭеит Кәарҷиа.
Ҭамара Лакрԥҳа лажәақәа рыла Аҟәа ахадара аусзуҩцәа, иаҭахызар ақалақь егьырҭ аусбарҭақәагьы ахәаахәҭратә ҭыԥқәа русура иацклаԥшлоит.
"Иҟалап, уи аҩыза аусурақәа аамҭа-аамҭала имҩаԥаҳгаларгьы. Ҳнеиааилоит, аусурақәа шцо гәаҳҭалоит", – лҳәеит Лакрԥҳа.
Архитектор хада иажәақәа рыла, ахәаахәҭыҩцәа рыбжеиҳараҩык уи алагалаҿыц рыдыркылеит.
"Иугәамԥхарц зыҟалом ауаа ақалақь ацқьареи, аԥшӡареи иахьадгыло. Ирацәаҩуп ахәаахәҭыҩцәа апалаткақәа ақалақь амҩақәа рахь аиагара иадгылаз", –иазгәалҭеит Ҭамара Лакрԥҳа.
Леон Кәарҷиа ишааицҳауа ала ахәаахәҭратә ҭыԥ ҿыц аиуразы Аҟәа ақалақь ахадара аиҳабы иахь арзаҳзал иҩҩыроуп. Ажеребиовка ашьҭахь, ахәаахәҭратә ҭыԥ аномер аниоу ашьҭахь идокументқәа иманы Аекономика анапхгарахь инаигароуп.
