АҞӘА, лаҵ 30 – Sputnik. Аҟәа Ақалақьтә Еизара адепутатцәа рыӡбарала Челиускинаа рыхьӡ зхыз амҩаду ихьӡ ахҵоуп Аԥсны Афырхаҵа Беслан Џьелиа.
Нанҳәамза 14, 1992 шықәсазы Аԥсны Аџьынџьтәылатә еибашьра аналага Беслан Џьелиа Ацҳа ҟаԥшь аҿы иҭаирхеит раԥхьатәи ақырҭқәа ртанк.
Беслан Џьелиа дҭахеит нанҳәамза 24, 1992 шықәсазы, Аҟәа араион, ақыҭа Шьрома имҩаԥысуаз аидыслараҿы. Уи аидыслараҿы амчқәа еиҟрамызт азы Беслан Џьелиа игәыԥ ақырҭқәа рыкәшеит. Беслан Џьели дҭахеит ихьаҵуаз игәыԥ шихьчоз. Беслан Џьелиа данҭаха ашьҭахь, Аԥсны Афырхаҵа ҳәа ахьӡ ихырҵеит.
Аҟәа Ақалақьтә Еизара адепутатцәа рыӡбарала, Ахақәиҭра ашҭа азааигәа иҟоу абаҳча Ахақәиҭра абаҳча ҳәа ахьӡ ахҵоуп.
Беслан Джелия
© Фото : из архива семьи Беслана Джелия
