Чкәан: атәым ҳәынҭқаррахь ҳкоманда ацара даара аҵакы дуны сахәаԥшуеит

© Sputnik Илона ХварцкияДуния Чкуан
Дуния Чкуан - Sputnik Аҧсны
Анапаҵаҩра
НовостиTelegram
Аҩада Кипр имҩаԥысуаз амҵәышәымпылтә еицлабра анаҩс, ҳделегациа ахаҭарнакцәа злахәыз аофициалтә еиԥылара мҩаԥысит.

АҞӘА, рашә 5 — Sputnik, Сырма Ашәԥҳа. Аԥсны Аҳәынҭқарра абаҩарҵәыреи аспорти рзы аҳәынҭқарратә еилакы амҵәышәымпылтә команда Ҭырқәтәыла, Аҩадатәи Кипр имҩаԥысуаз аицлабра рхы аладырхәит. Аделегациа хадара азыруан аилак аҟны иаԥҵоу аспорттә ҟәша аиҳабы Жанна Занҭариаԥҳаи Аԥсны амҵәышәымпылтә команда ахәмарҩы Дуниа Башал Чкәани. Имҩаԥган ахәмаррақәа ҩба, актәи аицлабраҟны ҳкоманда аиааира агеит 76:59 ҳәа. Аҩбатәи ахәарраҟны – аԥшәмацәа аԥыжәара рыман 59:57 ҳәа.

Аҩадатәи Кипр иҟоу Аԥснытәи амҵәышәымпыл асыҩцәа иахьа аиааира ргеит

Иазгәаҭаз ахԥатәи ахәмарра аанкылан ҳкоманда ахәмарцәа ахәахәақәа ахьроуз иахҟьаны. Абасала, акомандақәа еиҭахеит.

"Атәым ҳәынҭқаррахь ҳкоманда ацара даара аҵакы дуны сахәаԥшуеит, уи аԥхьаҟатәи ҳусқәа рзы ицхыраагӡа дууп аспорт аҿиара аус иацхраауеит", – ҳәа азгәеиҭеит абаҩарҵәыреи аспорти рзы Аҳәынҭқарратә еилакы аиҳабы Баграт Хәытаба.

Аҩада Кипр имҩаԥысуаз амҵәышәымпылтә еицлабра анаҩс, ҳделегациа ахаҭарнакцәа злахәыз аофициалтә еиԥылара мҩаԥысит.

"Аҩадатәи Кипр ахада Мысҭафа Ақынџьы даара ибзианы ҳидикылеит. Иара Аԥсны аҭоурых акыр дазҿлымҳан, дазҵааит шаҟа ҳәынҭқарра Аԥсны ахьыԥшымра азхарҵахьоу. Аԥснынтә аспорт азҟазацәа раԥхьаӡа акәны Кипр имҩаԥысуаз аицлабра рхы ахьаладырхәыз ахә ҳаракны ишьеит", – ҳәа азгәеиҭеит Чкәан.

Дуниа Чкәан Аҩада Кипр ахада Аԥсны Аҳәынҭқарра ахада Рауль Ҳаџьымба изынаишьҭыз ашәҟәы ианеишьеит. Иара убас ҳамҭас ииҭеит ҳтәыла раԥхьатәи ахада Владислав Арӡынба исахьа зну Аԥсар.

"Ҭоурыхла ҳара ҳтәылақәа еицырзеиԥшу ахҭысқәа ахьрымоу ыҟоуп. Шәара – Аԥсны аԥшьбатәи ахада дшәымоуп, саргьы аԥшьбатәи ахадас сыҟоуп иахьа Аҩадатәи Кипр", – иҳәеит Мысҭафа Ақынџьы.

Имҩаԥысит иара убас Аҩада Кипр Апарламент аиҳаби ҳделегациа алахәцәеи реиԥылара.

"Сара хылҵшьҭрала Кавказаа среиуоуп, Аԥсны аӡбахә саҳахьан, аха ари аԥсуааи сареи раԥхьатәи ҳаиԥылароуп. Аԥсныҟа анеира даара исҭахуп, сгәы иахәоит лабҿаба шәахьызбаз", – лҳәеит Апарламент аиҳабы Сибель Сибер.

Аҩадатәи Кипри Аԥснытәи аспорттә федерациеи аԥхьаҟа аусеицуреи аиҩызареи рзы аиқәышаҳаҭра рнапы аҵарҩырц ргәы иҭоуп.

Ажәабжьқәа зегьы
0