АҞӘА, рашә 10 — Sputnik, Саид Барганџьиа. 2011 шықәса инаркны, Аԥсны Ахада иӡбрала хәышықәса рыҩныҵҟа Аԥсны зус ӡбыз ԥшьҩык ршьауӷа рхыхын ҳәа Sputnik иазеиҭеиҳәеит Аԥсны Аҳәынҭқарра ахада иусбарҭаҟны ашьауӷа ахыхразы акомиссиа алахәыла, ашьауӷа ахыхреи аҳәынҭқарратә ҳамҭақәеи рызҵаарақәа рзы ареферент еиҳабы Беслан Шьынқәба.
Иара иажәақәа рыла, акомиссиа хԥаҟа шықәса аусура аанкылан ҳәа уҳәар алшоит. Активла аусура анхацыркыз 2015 шықәса, жәабран 26 инаркны ауп.
Иара иазгәеиҭеит, дарбанызаалак иҭаку ауаҩԥсы, иқәу ашықәс абжа зхызгахьоу ашьауӷа ақәхразы азыҳәа ҟаиҵар илшоит ҳәа. Акомиссиа абжьагаратә ҟазшьа амоуп. Ашьауӷа ақәхразы Акт атәыла Ахада иаԥиҵоит иҳәеит иара.
"Атәыла ахада илшоит азыҳәа мап ацәикыр. Иҭаку ауаҩԥсы изныкымкәа азакәан еилеигахьазар, иҟаиҵаз азыҳәа мап ацәкхар ауеит", — азгәеиҭеит Шьынқәба.
Беслан Шьынқәба иажәақәа рыла Аԥсны, ацәгьара бааԥс зуз ауаҩы ишьауӷа иқәырхны иҟамлацызт.
"Акомиссиа алахәылацәа ҳуаажәларратә еилазаара ахаҭарнакцәа роуп. Аиҳарак урҭ ауаажәларратә усура рнапы алакуп", — иҳәеит Шьынқәба.
Ашьауӷа ахыхреи аҳәынҭқарратә ҳамҭақәеи рызҵаарақәа рзы ареферент еиҳабы Беслан Шьынқәба иазгәеиҭеит ашьауӷа ақәхразы мап зцәыркыз ауаҩы шықәсык аниаслак ашьҭахь еиҭах азыҳәа ҟаиҵар шилшо.
