Азеижәтәи ашәышықәсазы аҭоурыхдырыҩцәа агәаанагара рыман ауахәама ажәеизатәи ашәышықәса мамзаргьы аабатәии ажәабатәии ашәышықәсақәа рзы иргылан ҳәа. 1970 шықәса рзы аиҭашьақәыргыларатә усурақәа раан ахыб хыхьтәи ахәҭаҟны ирбеит 30 рҟынӡа макьаҭ. Асеиԥш иҟаз аметод ахархәара ажәытәтәи аргылаҩцәа иҟарҵон аконструкциа акапан еиҳа имаҷхарц азы. Амакьаҭқәа рыҭҵаара иалнаршеит ауахәама афбатәии абыжьбатәии ашәышықәсақәа рзы ишыргылаз.
Архитектуратә ҟазшьақәеи адәахьтәи аԥшреи рыла ауахәама Кавказ иахьаҵанакуа иргылоу адинҟазшьа змоу ахыбрақәа иреиԥшым. Иара – заатәи византиатәи архитекттурахь иаҵадыркуеит. Ус шакәуггьы иҟоуп аҟазшьа ҷыдақәа – арҭ ахыбрақәа рыклассикатә вариант аҟны акупол ала ихыркәшо абарабан аркақәа рыла иеидҳәалоу ашьаҟақәа ирықәууп. Драндатәи ауахәама акупол аизакырақәа ирықәуп. Урҭ рыӷәӷәароуп иахьанӡагьы ауахәама еиқәырханы измоу.
