АҞӘА, рашә 23. Sputnik. Амилициа ақалақьтәи араионтәи органқәа атәыла Ахада идырдырит ацәгьоура иаҿагыланы ақәԥара аус аҭагылазаашьа ҳәа аанацҳауеит Рауль Ҳаџьымба иофициалтә саит.
Атәыла Ахада иазгәеиҭеит аоперативтә информациа аизгареи анализ азуреи рзы аусурақәа шырӷәӷәатәу. Р. Ҳаџьымба иажәақәа рыла Аҩныҵҟатәи аусқәа рминистрреи иара аҟәшақәеи русура арӷәӷәара аҭахуп еиҳаракгьы акурорттә сезон алагамҭазы.
Рауль Ҳаџьымба Аҩныҵҟатәи аусқәа рминистр Беслан Ҳагба адҵа ииҭеит атәыла ақалақьқәеи араионқәеи рҟны апатруль аныҟәарақәа мҩаԥгахаларц, уахгьы-ҽынгьы ауаа ршәарҭадара еиҿкаахарц, аиҳаракгьы аԥсшьарҭа ҭыԥқәа рҟны.
Аилацәажәараан иара убасгьы иазааҭгылан автоинспекциа аусура атәы. Атәыла Ахада МВД аиҳабыра рҿаԥхьа иқәиргылеит ауснагӡатә: ахатәы автотранспорт атехниикатә гәаҭара ахыжьра аанкыларазы ажәалагалақәа аздырхиарц.
Ҳаџьымба МВД аиҳабыра рнапы ианиҵеит амҩатә ԥҟаррақәа изныкымкәа еилазго рганахьала аҭакԥхықәра еиҳартәырц, аиҳаракгьы арыжәтәи анаркотикатә маҭәашьарқәеи злаҵаны иҟоу рзы ҳәа аанацҳауеит асаит.
