АҞӘА, ԥхынгәы 7 — Sputnik. Вена ақалақь аҟны зхы зкыз амузыкатә фестиваль "Хьыбла Гьерзмаа шәаалыԥхьоит…" иацҵахоит Аԥсны, ԥхынгәымза анҵәамҭазы ихыркәшахоит Ниу-Иорк ақалақь Carnegie Hall асценаҟны ҳәа аанацҳауеит афирма "Мелодиа" апресс-маҵзура.
"Ԥхынгәы 30, 31 рзы афестиваль Аԥсны имҩаԥысуеит. Ароуп уи раԥхьаӡа иахьхацыркхазгьы. Афестиваль аркра мҩаԥысраны иҟоуп Ниу-Иорк ақалақь Carnegie Hall асценаҟны, жьҭаара 8 рзы. Апрограмма "Аурыс музыкеи италиатәи амузыкеи ршедеврқәа" иалахәхоит Хьыбла Гьерзмааԥҳаи Екатерина Ганелинеи (афортопиано) ҳәа арбоуп адырраҭараҟны.
Ԥхынгәы зо рзы Аԥсуа драматә театр аҟны Александр Сладковски напхгара зиҭо Ареспублика Ҭаҭарсҭан Аҳәынҭқарратә симфониатә оркестр амҩаԥгарала иқәгылоит Хьыбла Гьерзмааԥҳаи Николаи Ерохини, Ильдар Абдразакови. Адырҩаҽны, Аҳәынҭқарратә филармониа асценаҟны имҩаԥысраны иҟоуп Анжелика Варуми, Леонид Агутини, агәыԥ "Есперантои" рконцерт.
Апресс-маҵзура иазгәанаҭоит: афестиваль азыҳәан ҷыдала сынтәа, афирма "Мелодиеи" азинамазаара адгылара Амилаҭтә фонди асасцәа рзы иаздырхиеит аҳамҭатә ҭыжьымҭа – Владимир
Спиваков напхгара зиҭо Урыстәыла амилаҭтә филармониатә оркестри Хьыбла Гьерзмааԥҳаи рконцерт зну DVD –қәа ҩба иара убасгьы аконцертқәа зҭаҩу акомпакт-диск.
