АҞӘА, ԥхынгәы 13 – Sputnik, Бадраҟ Аҩӡба. Тҟәарчалтәи ахәбатәи абжьаратәи ашкол арҵаҩцәа макьанагьы ирмоуцт, ахәаша, ԥхынгәы 10 рзы бџьарла еибыҭаз ацәгьоуцәа ирӷьычыз рулафахәы. Абри атәы Sputnik акорреспондент изаалыцҳаит Тҟәарчал ақалақь Ахада Аида Чачхалиаԥҳа.
"Ҳара аиҳабыра рҟынтәи ацхыраара ҳазыԥшуп. Ҳалшарақәа иалдыршом арҵаҩцәа афинанстә цхыраара рыҭара", — лҳәеит Чачхалиаԥҳа.
Ацәгьоуцәа рыԥшаара Тҟәарчалтәи араион Аҩныҵҟатәи аусқәа рорганқәа аҿуп. Ацәгьоуцәа злааз автомашьына рыблит рышьҭа дырӡырц азы. Амилициа агәаанагара рымоуп иҟарҵаз ақәылара ашьҭахь аӷьычцәа абнара рҽарҭеит ҳәа.
Ацәгьоуцәа Тҟәарчалтәи а-5-тәи абжьаратә школ адиректор Дмитри Шьоууа иқәлеит ԥхынгәы 10 рзы, асааҭ 10 рзеиԥш. Миллионбжак аҟынӡа арҵаҩцәа рулафахәы аԥара имырхит.
