Ауарӷанарҳәаҩ Анастасиа Черток лконцерт мҩаԥысит Пицундатәи ауахәамаҿы

Ауарӷанарҳәаҩ Анастасиа Черток лконцерт
Ауарӷанарҳәаҩ Анастасиа Черток лконцерт - Sputnik Аҧсны
Анапаҵаҩра
НовостиTelegram
Москва иҟоу Пушкин имузеи ауарӷанарҳәаҩ Анастасиа Черток Пицундатәи ауахәамаҟны аконцерт мҩаԥылгеит.

ПИЦУНДА, нанҳәа 4 — Sputnik, Роберт Џьапуа. Александр Сергеи-иԥа Пушкин ихьӡ зху Москватәи аҳәынҭқарратә музеи ауарӷанарҳәаҩ хада Анастасиа Черток Пицундатәи ауахәама аҳәынҭқарратә концерттә зал аҟны асолотә концерт мҩаԥылгеит.

Ажурналистцәеи лареи реиԥылараан Анастасиа Черток иазгәалҭеит Пицундатәи ауахәама аконцерттә зал аҟны ақәгылара дазыҳәо дыҟазижьҭеи акыр шыҵуаз.

"Идгьылтәым агәалаҟара сымоуп, араҟа убас иԥшӡоуп, ибзиоуп, игәырдагоуп. Аконцертқәа рымҩаԥгаразы маҷк ишоразаргьы асеиԥш иҟоу аԥшӡареи, асеиԥш иҟоу ауарӷани рзы иулымшашагьы улуршоит. Аинструмент акәзар уатәнатәуеит. Иуниверсалтәу инструментуп. Ауарӷанарҳәаҩ изы аҵакы дууп ииҭаху зегьы аинструмент иалиршо ианыҟоу", — лҳәеит Черток.

Пицундатәи ауахәама аконцерттә зал адиректор Гәында Агрԥҳа Sputnik акорреспондент изеиҭалҳәеит Анастасиа Черток лконцерт пицундатәи ауарӷан 40-шықәса ахыҵра аныҳәа аҳәаақәа ишырҭагӡо.

"Ари апроект аҳәаақәа ирҭагӡаны араҟа имҩаԥысхьеит аконцертқәа ааба. Урҭ ирылахәын аԥснытәиқәа реиԥш урыстәылатәи артистцәагьы: Нана Черқьезиаԥҳа, Лука Гаделиа, Кристина Ешԥҳа, Альдона Цкәиаԥҳа, Саид Гобечиа, Марина Шамԥҳа, Анна Иурикова, Евгениа Кривицкаиа. Иқәгылара ҳазыԥшуп Гарри Кониаев – Пицундатәи ауахәама раԥхьатәи ауарӷанарҳәаҩ. Иара убасгьы даараны дыҟоуп аклипмеикер Ирина Миронова. Уи лконцерт иалахәхоит Лука Гаделиеи Кристина Ешԥҳаи", — лҳәеит Агрԥҳа.

Лука Гаделиа иажәақәа рыла Анастасиа Черток лықәгылара атәыла акультуратә ԥсҭазаараҟны аҵак ду зманы иҟоу хҭысхеит.

Лука Гаделиа - Sputnik Аҧсны
Гаделиа 30 шықәса ихыҵреи иҟазаратә мҩа 10 шықәса ахыҵреи азгәеиҭеит

"Анастасиа Черток еицырдыруа уарӷанарҳәаҩуп, жәларбжьаратәи аконкурсқәа дырлауреатуп, урыстәылатәи аҿартә музыкатә премиа "Триумф" далауреатуп. Лааԥхьара ҳҭахижьҭеи акрааҵуан, аха аамҭа лымамызт, ҳаргьы ҳалшамҭақәагьы маҷын. Уажәазы афинанстә ацхыраара ҳарҭеит москватәи аԥсуа диаспора", — ҳәа азгәеиҭеит Гаделиа.

2015 шықәса цәыббрамзазы ауахәамаҟны имҩаԥысраны иҟоуп ахԥатәи афестиваль «Органные вечера в Пицунде». Уи иалахәхараны иҟоуп ааигәатәии харатәии атәымҳәынҭқаррақәа руарӷанарҳәаҩцәа. 2015 шықәса абҵара 4 рзы аконцерттә зал аҟны еиҿкаахоит агала-концерт. Иара азкуп 1975 шықәсазы Пицундатәи ауахәамаҟны иқәдыргылаз ауарӷан 40-шықәса ахыҵра.

Пицундатәи ауахәама ақалақь аҟны еиҳа изҭаауа ҭыԥуп. Иара иамоу акустикатә ҟазшьа иалнаршоит аконцерт дуқәа рымҩаԥгара. Аԥхынразы арахь иааиуеит ареспублика ауааԥсыра реиԥш хыԥхьаӡара рацәала Аԥсны иаҭаауа асасцәагьы.

Ажәабжьқәа зегьы
0