АҞӘА, нанҳәа 14 — Sputnik, Асҭанда Арӡынԥҳа. Атәыла ахада Рауль Ҳаџьымба, Апарламент аиҳабы Валерии Бганба, аԥыза-министр Артур Амқәаб, Аминистрцәа Реилазаара алахәылацәа, Жәлар Реизара адепутатцәа, Аԥсны иҟоу Урыстәылатәи Афедерациа Ацҳаражәҳәаҩ ашәҭ шьыҵәрақәа шьҭарҵарц инеит Ахьӡ-аԥша апарк аҟны игылоу абаҟахьы.
Аԥыза-министр Артур Амқәаб инаҵшьны иазгәеиҭеит нанҳәа 14 аԥсуа ҳәынҭқарра аиҭашьақәыргылара иамшуп уҳәар ауеит ҳәа.
"Ари илахьеиқәҵагоу амш сара иазысҳәар сылшоит аԥсуа ҳәынҭқарра аиҭашьақәыргыларагьы иамшуп ҳәа. Ажәлар ирылдыршаз иаартны иунарбоит ахатәы ҳәынҭқарра амазааразы ҳажәлар аӡәгьы иҿаԥхьа ишхьамҵуа, рдоуҳа шдуу", — иҳәеит Амқәаб.
Иара убасгьы иазгәеиҭеит иҭахаз ргәалашәара ахааназ ишмыӡуа.
"Ҳара ахаангьы иаҳхашҭраны ҳаҟам иаҳцәӡыз. Урҭ рыԥсадгьыл рхы ақәырҵеит, ахақәиҭреи ахьыԥшымреи рхы рықәырҵеит. Рҭаацәарақәа рҿаԥхьа схырхәоит, рыхшара агәабзиареи аманшәалареи рзеиӷьасшьоит", — иҳәеит Амқәаб.
Атәыла аиҳабыра, ареспублика ауаажәларра, ақалақь ауааԥсыра ашәҭшьыҵәрақәа шьҭарҵарц инеит Ахьӡ-аԥша апарк аҟны игылоу абаҟахьы.
1992 шықәса нанҳәа 14 рзы Қырҭтәыла амилаҭтә гвардиа, аихамҩа ахьчара ахьыӡҵаны, Аԥсны иалалеит. Аоперациа иалахәын ҩ-нызқьҩык инарзынаԥшуа ар, 60 цыра абронетехника, артиллериа.
