АҞӘА, нанҳәа 19 – Sputnik. Аԥсны ахада Рауль Ҳаџьымба Арасаӡыхь ақыҭатә школ автобус маҷ Mercedes Sprinter ҳамҭас иеиҭеит ҳәа аанацҳауеит атәыла ахада иофициалтә саит.
Аацҳамҭа ишаҳәо ала, аиԥылараҟны Арасаӡыхь ақыҭа иамоу апроблемақәа иаартны ишрылацәажәаз. Ақыҭауаа иазгәарҭеит амҩақәа рҭагылазаашьеи ақыҭа ӡыла иахьеиқәшәами ауадаҩрақәа шрырҭо.
Атәыла ахада иазгәеиҭеит Аԥсны ақыҭақәа рыпроблемақәа зехьынџьара ишеиԥшу. Хаз игоу қыҭақәак рыпроблемақәа ӡбо ԥхьаҟазы иазнеитәуп иаку Аҳәынҭқарратә программа ақыҭа арҿиаразы.
Араион ахада Хьрыԥс Џьапуа иазгәеиҭеит иҟоу проблемақәак араионқәа рҟны ирыӡбар шалшо.
Арасаӡыхьтәи ашкол адиректор Раиса Ҵулукьиаԥҳа дрылацәажәеит ашкол иамоу апроблемақәа ртәы.
"Ашкол аҟны аҵара рҵоит 52-ҩык ахәыҷқәа. Ахыбра хәыҷуп убри азы ҩ-сменакны аус ааулароуп", — лҳәеит лара.
Атәыла Ахадеи араион анапхгареи ашкол ахыбра рбеит, иалацәажәеит аремонт азуразы иалшоны иҟоу атәы.
Арасаӡыхь ақыҭа ахада Рамин Қаџьаиа иазгәеиҭеит иҟоу ауадаҩрақәа ирхьмырԥшыкәа аиҭакрақәа убартә ишыҟоу.
Рауль Ҳаџьымба иныҟәараҟны дымҩаԥыргон Очамчыра араион ахада Хьрыԥс Џьапуа, уи ихаҭыԥуаҩ Славик Қәычбериа.
