АҞӘА, нанҳәа 31 – Sputnik, Бадраҟ Аҩӡба. Аԥсны Жәлар рышәҟәыҩҩы, Дырмит Гәлиа ихьӡ зху аҳәынҭқарратә премиа алауреат Шьалодиа Аџьынџьал иԥсҭазаара далҵит ашәахьа нанҳәа 31 аҽны.
"Шьалодиа Аџьынџьал инапы иҵыҵит асатиратә ажәабжьқәа, аповестқәа, ароманқәа. Аԥсуа литератураҿы иаалукааша аҩымҭақәа иреиуоуп аповест "Амзаҿа ангыло", уи иалхны иқәдыргылеит аспектакль бзиаӡа. Шьалодиа Аџьынџьал ироман "Аҳәа зыҟәну аџьныш" аԥхьаҩцәа ирылаҵәахьоу иреиуоуп. Аԥсуа литература, иааидкыланы аԥсуа культура иахьа ацәыӡ ду аиуит", — иҳәеит апоет, ажурнал "Алашара" аредактор хада Анатоли Лагәлаа.
Шьалодиа Аџьынџьал диит 1932 шықәса рзы. Шьалодиа Аџьынџьал иҩымҭақәа "Амзаҿа ангыло", "Иԥшьоу ажьира асаркьал" рыла акиностудиа "Мосфильм" аҟны иаԥҵан асахьаркыратә фильмқәа. 1978 шықәсазы ашәҟәҭыжьырҭа "Алашара" аҟны урыс бызшәала иҭыжьын Шьалодиа Аџьынџьал раԥхьатәи ишәҟәы "Корни".
