АҞӘА, цәыббра 8 — Sputnik, Наала Аҩӡыԥҳа. Приднестровиантәи ианыхынҳәуаз Аԥснытәи аделегациа Кишиниовтәи аҳаиртә баӷәазаҟны аҳаирплан ахь инеиит Молдавиа аҳәынҭқарратә маҵзурақәа руак ахаҭарнакцәа. атәыла Ахада ихаҭыԥуаҩ Витали Габниеи, Иабжьгаҩ Владимир Занҭариеи рыжәлақәа ҳәаны Аԥснытәи аделегациа аҳаирплан иҭыргеит. Абри атәы ҳкорреспондент илзеиҭеиҳәеит Витали Габниа.
"Аҳаирплан ҳҭыго урҭ ҳнарыԥхьеит дара ахьцо ҳрыццарц. Абраҟа Аб Виссарион Аԥлиа хаҵаҵас ихы мҩаԥигеит. Иара аҳаирплан 15-20 минуҭ ишьҭыԥраар иуамызт, атәыла Ахада ихаҭыԥуаҩ атәым ҳәынҭқарраҟны дынсыжьуам ҳәа. амполициа анариад ирыԥхьеит аха иара ҳара ҳазгоз амашьына дҳацҭамлар имуит" — иҳәеит Габниа.
Аб Виссарион азыԥшырҭатә зал ахьднаганы Витали Габниеи Владимир Занҭариеи хаз-хаз ауадақәа рҟны иртәаны ирыҿцәажәон.
"Сара исарҳәон Приднестровие криминалтә ҳәынҭқарроуп, ԥхьаҟагьы ԥеиԥш амам ҳәа. Сара аҭакс исҳәеит агитациа араҟа ишаҭыԥым, аҭагылазаашьа бзианы ишыздыруа избанзар уахьынтәи шакәу сахьаауа. Исҳәеит дареи ҳареи аӡиас аҩ-ҟәарак ҳреиԥшны ҳшыҟоу. Приднестровиеи Аԥсни Урыстәылеи еицаҳзеиԥшу ҳәааркырак ҳшаҵанакуа, Приднестровиагьы иаҭахны ианыҟало адгылара шаҳҭо", — еиҭеиҳәон Витали Габниа.
Аҳәынҭқарратә маҵзура ицәырыргеит Витали Габниа дзыԥхьаз Аԥсны Ахада идныҳәаларатә шәҟәы аӡбахә. Уаҟагь иарбан ацәаҳәа: иаҭахханы ианыҟало Приднестровие адгылара аҭара ҳшазыхио.
"Иарбан аамҭа уадаҩу зыӡбахә шәымоу? Адгылара бџьаршьҭыхрала аума рыҭара шәшазыхио?" — ҳәа иҵаауан аҳәынҭмаҵзура аусзуҩцәа.
Приднестровиатә аган Молдавиа иҟоу Урыстәылатәи Афедерациа Ацҳаражәҳәаҩ днанаԥхьеит. Уи абри аамҭақәа рзы аԥсуа делегациа дрыцҟан ҳәа еиҭеиҳәеит Габниа.
Аиҿцәажәарахь инаԥхьаз амиграциатә маҵзура ахаҭарнак иҳаиҳәеит Молдавиа алалара 10-шықәса азин шҳамам.
"25-шықәсатәи аиубилеи аан сыҟан, ус анакәха аиубилеиқәа раан саалоит- сҳәеит сара. Иҟалаз хьаа снамҭеит акызаҵәык Приднестровиатәи ҳҩызцәа рахь лассы-лассы ишысҭаху еиԥш сызцалом. Иҟалаз ахҭыс Аԥсни Приднестровиеи реизыҟазаашьақәа ԥырхага рнаҭом", — азгәеиҭеит иара.
Аб Виссарион дахьчиновникым инадҳәаланы уи аркьаҿра даҵанакуам.
Амаҵзура ҷыда аусзуҩцәа ҳаҭырла рхы мҩаԥыргон, иҟалаз аинцидент азы аҭамзаара шьҭарҵон ҳәа азгәеиҭеит Габниа.
