АҞӘА, цәыббра 10 — Sputnik. Аминистрцәа Реилазаара аилатәараҟны, аԥшьаша, цәыббра 10 рзы ишьақәдырӷәӷәеит Аимадареи амассатә коммуникациақәеи рзы аҳәынҭқарратә усбарҭа аиҳабы ихаҭыԥуаҩыс Дмитрии Осиа дҟаҵазарц.
Дмитри Осиа далгеит аимадареи аинформатикеи рзы Москватәи атехникатә университет (МТУСИ), "Акоммуникациа аҳақәа, аимадарақәа, асистемақәа" рфакультет, анџьныр изанааҭ иманы.
2013 шықәса рзы Урыстәылатәи ақыҭанхамҩатә академиеи Урыстәылатәи Афедерациа Ахада инапаҵаҟа иҟоу аҳәынҭқарратә маҵзуреи рҟны амагистратура далгеит ("Аҳәынҭқарратәи амуниципалтәи напхгара асистема" азанааҭ ала). 2011 шықәса инаркны иахьатәи аамҭанӡа Дмитри Осиа МТУСИ даспирантуп.
Осиа дравторуп ааба рҟынӡа кьыԥхьымҭа, жәларбжьаратәи аимадара ажурнал "Т-СОММ"-гьы абрахь иналаҵаны, Cisco Systems CCNA "Routing and Switching" акурсқәа дырхысит.
