АҞӘА, цәыббра 11 — Sputnik, Наала Аҩӡыԥҳа. Цәыббрамзазы Александр Калиагин напхгара зиҭо Москватәи атеатр "Et Cetera" аҟны имҩаԥысраны иҟоуп Аԥсуа ҳәынҭқарратә драматә театр агострольтә спектакльқәа дырбара.
Цәыббра 18-19 рзы москватәи ахәаԥшыҩцәа ирбараны иҟоуп арежиссиор Валерии Ақаҩба иқәиргылаз аспектакльқәа "Аҽшьҩы" (Николаи Ердман), "Аԥара аапкқәа" (Александр Островски).
Адраматә театр арепертуар аҟны иҟоуп атеатр аремонт ахьынӡамҩаԥысуаз ахәаԥшцәа ирыдгыламыз аспектакльқәа, избанзар афестивальқәа рахь иаагоз еиҳа иаҳзыманшәалаз аспектакльқәа ракәын иҳәеит Валерии Ақаҩба.
"Ҳара ҳцоит Урыстәылаҟа, атеатртә культура аҭыԥ ду ахьааннакыло. Уахь ҳара иаагоит аурыс драматургиа. Аинтерес аҵоуп Сергеи Женовичгьы Москва "Аҽшьҩы" ахьықәиргылаз. Урҭ реиҿырԥшра алыршахоит", — иҳәеит арежиссиор.
Апиесақәа ҩба рнаҩсгьы апрограмма иалоуп ақәыргыламҭа "Атеатр аартра". Арахь иаҵанакуеит атеатр арепертуар аҟынтәи аспектакльқәа рыхәҭақәа.
Аԥсуа театр агострольқәа Москва имҩаԥысуеит 2015 шықәсазы Урыстәылатәи Афедерациа Акультура аминистрреи Аԥсны Аҳәынҭқарра Акультуреи аҭоурых-культуратә ҭынхақәа реиқәырхара аминистрреи русеицура аплан анагӡара аҳәаақәа ирҭагӡаны.
