Астанда Арӡынԥҳа, Sputnik.
Шәыԥсшьарамшқәа ҭагалан иақәшәазар – хьаас ишәымкын. Аԥсшьаразы ҭагалан иманшәалоу аамҭоуп. Ҭагалантәи Аԥсны иҷыдоу аԥшӡара амоуп, амшын акәзар аԥхын еизнакыз аԥхарра шамац иамоуп, амрагьы каххаа иԥхоит. Ашьхарахь аҳауа ахьшәашәара шаҵоугьы амшын иахьаԥну иԥхарроуп.
Абри аамҭазы Аԥсны аҭаара амзыз хадақәа хәба ҳарзааҭгылап.
1. Ҭагалантәи апеизаж аԥшӡарақәа рбара.
Ҭагалан ареспублика аҭааҩцәа ирбар рылшоит ԥшшәы рацәала иҽырбо аҵиаа, зышәҭра миасыц ашәҭқәа, анаҟә зыхиаало Риҵа, еибарыҩуа амшын иазнеиуа ашьха ӡиасқәа.
2. Ҭагалантәи ашәыри аргәыци ргьама абара.
Аԥсны ҭагалан ажь иаамҭаны иԥхьаӡоуп. Аԥсуа қыҭақәа рҟны иубар улшоит еиқәаҵәаҳҳараӡа иҟалахьоу ажьыргәыцқәа ишрылырхуа еилаччо аҩы. Иҟалоит уи агьама убаргьы. Ақалақь аџьырмыкьаҟны иҟоуп зеиуахк уҭаху ашәыр, аргәыц. Ҭагалан иҟалоит акиви, афеихоа. Иара убасгьы ҭагалан анҵәамҭаз иҟалоит ахәырма.
З.Лыхны аҽаҩра аныҳәа аҭаара
Есышықәса, ажәытәтәи аԥсуа ҳәынҭқарцәа ртәарҭа, Лыхны ақыҭан имҩаԥыргоит аҽаҩра аныҳәа- Лыхнашҭа. Абри аҽны аҽыҩҷкәынцәа еиндаҭлоит, иеивагьыжьуа икәашоит аҿар, инарыгӡоит аԥсуа шәақәа, арахь ицәырыгоит анапкымҭа ссирқәа. Аҽаҩра аныҳәа иунаҭоит алшара атәыла аҵасқәеи ақьабзқәеи ааигәаны рдырра.
4. Аҽырыҩрахь ацара
Аԥсны ҭагалан имҩаԥыргоит аҽырыҩразы ареспублика ачемпионат, уи адагьы цәыббра зо рзы Аиааира амш аҽна ареспублика ақыҭақәа зегь рҟнгьы аҽырыҩрақәа мҩаԥысуеит. Аспортсменцәа еизаз иддырбоит рҟазара, рҟыбаҩ. Ахархәара рымоуп: аҭарчеи, ҽыла ампыл асра, ԥсуаҵас аҽырхәмарра, аимҵакьача, аҳәаҟьара, аҵәеигәыдҵа.
5. Пицундатәи ауахәамаҟны ауарӷан азыӡырыҩрра
Ҭагалан акультуратә сезон иасакьаҳәымҭаны иҟоуп. IX–тәи ашәышықәса иаҵанакуа ауахәама иҩныҩуеит адунеи ашәаҳәаҩцәа иреиӷьу рынагӡамҭақәа, араҟа иқәгылоит акамертә оркестр, игоит алакәтәылахь уназго ауарӷан абжьы. Цәыббратәи ауарӷан афестиваль Пицундатәи ауахәамаҿы еицырдыруа иҟалахьеит, аҭааҩцәагьы рацәаҩны иамоуп.
Атуристтә сезон макьана ихыркәшам, атурагентрақәа ааԥхьара ҟарҵоит атәыла аԥшӡарақәа рбаразы. Уи адагьы ҭагалан, анхара ахә еиҳа еиҵоуп аурыс-аԥсуа ҳәааҟнгьы ауаа рацәа ыҟам, аиасра еиҳа имариоуп.
