ГАГРА, цәыббра 15 — Sputnik, Саида Жьиԥҳа. Гагра араион Ахадара аиҳабы Беслан Барцыц Вениамин Кондратиев идиныҳәалеит Краснодар атәылаҿацә агубернатор иалхрақәа рҿы аиаиира ахьигаз.
"Иахьа Краснодар атәылаҿацә Ахада ҿыц иалхра ашьҭахь акырӡа ҳақәгәыӷуеит ҳаимадара арӷәӷәареи ҳусеицуреи. Агәраганы сыҟоуп иаарласны Краснодар атәылаҿацә анапхгареи ҳареи ҳшеиқәшәо, ишацаҳҵо акыршықәса иҳабжьоу аизыҟазаашьа бзиақәа. Гагра араион анапхгара ахьӡала иазҳархиеит Вениамин Кондратиев ихьӡала адныҳәаларатә шәҟәы, иаарласны уахь иҳашьҭуеит", — иҳәеит Барцыц.
Беслан Барцыц иара убас иазгәеиҭеит ԥасатәи Краснодар атәылаҿацә агубернатор Александр Ткачиов лассы-лассы Аԥсныҟа дшаауаз, ҷыдала дшаҭаауаз Гагра араион. Агәыларатә регион изныкымкәа ҳраион ацхыраара анаҭахьан, ақалақь анхарҭатә усбарҭазы иаахәан атехника ҷыда, акапиталтә ремонт азун Гагратәи абжьаратә школ №2.
Краснодар атәылаҿацә Аԥсны аџьынџьтәылатә еибашьраани уи ашьҭахьи Аԥсныҟа иаанашьҭуан агәыҳалалратә цхыраарагьы.
"Ҷыдала, ԥасатәи Краснодар атәылаҿацә анапхгара иҭабуп ҳәа расҳәоит ҳажәлар рганахь иаадырԥшуаз агәцаракразы, ҿыц иалху иареи ҳареи ҳакәзар хымԥада ҳаиҩызара иацаҳҵоит", — иазгәеиҭеит Гагра араион Ахада.
