АҞӘА, цәыббра 15 — Sputnik, Наала Аҩӡыԥҳа. Аԥсны Аҭҵаарадыррақәа Ракадемиа аботаника Аинститут аҟны имҩаԥысит Аԥсны Аҭҵаарадыррақәа Ракадемиа Апрезидент ихаҭыԥуаҩ, абиологиатә наукақәа ркандидат, апрофессор Сергеи Бебиа 75 шықәса ихыҵра иазкыз аконференциа.
Атәыла Ахада Рауль Ҳаџьымба Идҵа инақәыршәаны Сергеи Бебиа ихҵоуп "Аԥсны Аҳәынҭқарра иреиҳаӡоу ашкол зҽаԥсазтәыз аусзуҩ" ҳәа аҳаҭыртә хьӡы. Абри атәы ҳзааицҳаит атәыла Ахада иабжьгаҩ Владимир Занҭариа.
Аботаника Аинститут адиректор Едуард Гәбаз ишаҳзеиҭеиҳәаз ала, аиубилиар хаҭала иалахәрала Аԥсны СССР аҩныҵҟа раԥхьаӡа акәны иаԥырҵо иалагеит абнатә культурақәеи арахь иаагаз амонокультурақәеи рексперементалтә хкаарақәа.
"Абри аусура иалҵшәаны, ҳколлегацәеи ҳареи арҭ аҭыԥқәа рҟны ҳусеицура шьаҭаны иаиуит абнатә культура аԥыжәара змоу аҵлажәлақәа ралагаларазы ажәалагалақәа рыҟаҵара. Иахьазы урҭ ирылшоит атәылаҟны амҿымаҭәахә азымхара ахарҭәаареи Амшын Еиқәа иаԥну Кавказтәи аԥшаҳәаҟны абнара аизырҳареи, хаҭала Аԥсны", — иҳәеит Гәбаз.
Аԥсны ахы ианақәиҭыртә ашьҭахь аԥхьатәи амшқәа рзыҵәҟьа Сергеи Бебиа иусура дазыхынҳәит иҳәеит Гәбаз.
"Аботаникатә баҳча аҭагылазаашьа рыцҳа шиқәыӷәӷәозгьы, иареи иара иеиԥшны згәы еицҳауаз абаҳча аусзуҩцәеи, адиректор Гиви Гьаргь-иԥа Аиба раԥхьа днаргыланы, Сергеи Михаил-иԥеи ирылшоз зегь ҟарҵон. Аус руан улафахәыда, ԥхаррада, усҟан дара рзы ихадаз аботаникатә баҳча аколлекциа аиҭашьақәыргылара акәын", — иҳәеит Гәбаз.
Сергеи Бебиа ишиҳәаз ала, иара изы реиҳа иуадаҩыз шықәсын 2002-тәи ашықәс – аколлектив аботаника Аинститут анапхгара анидырҵаз, иҳәеит Едуард Гәбаз. 2006 шықәса рзы аботаника Аинститут аҭагылазаашьа аҽаԥсахит аиӷьхара аганахьала. Ирызҳауа иалагеит аусзуҩцәа рхыԥхьаӡара, еиҭашьақәыргылахеит уаанӡатәи аимадарақәа, иҿио иалагеит аимадара ҿыцқәа.
Аҭҵаарадырратә усура адагьы Сергеи Бебиа ауаажәларратә дипломатиатә усура мҩаԥигон. 1989 шықәса инаркны иара активла далахәын жәлар рфорум "Аидгылара".
"Сергеи Михаил-иԥа дреиуоуп имшәакәа, 1989 шықәса рзы, Лыхнашҭатәи жәлар реизара зҽалазырхәыз. Араҟа иара иаартны иҳәеит ареспублика аԥсабаратә ресурсқәа гыгшәыг ҳасабла ишрызнеиуа, иаҭахны ишыҟоу аиҭакра дуқәа", — иҳәеит Гәбаз.
Дипломаттә усзуҩык, Аԥсны Адәныҟатәи аусқәа рминистрра ахаҭарнакк иаҳасабала 2010 шықәса рзы Сергеи Бебиа илиршеит Европа, Венгриа, Шандор Петефи имузеи иахьаҵанакуа аҵакырадгьыл аҟны аԥсуа поет Баграт Шьынқәба ибаҟа ақәыргылара ҳәа азгәеиҭеит Гәбаз.
