АҞӘА, цәыббра 17 — Sputnik, Роберт Џьапуа. Аԥсуа шьапылампыласҩы Руслан Аџьынџьал ихы алаирхәуеит Аԥсны ашьапылампыл Афедерациа анапхгаҩы заанаҵтәи, изаамҭанытәим иалхрақәа. Абри атәы ҳкорреспондент изеиҭалҳәеит Афедерациа апресс-маӡаныҟәгаҩ Мадина Бганԥҳа.
"Аԥсны ашьапылампыл Афедерациа апрезидент Џьамал Гәбази Руслан Аџьынџьали ҭелла еицәажәон. Аицәажәараан Руслан Аџьынџьал иҳәеит Афедерациа апрезидент иалхрақәа иҽрылаирхәырц игәы ишҭоу", — лҳәеит Бганԥҳа.
Уаанӡа Џьамал Гәбаз аҳәамҭа ҟаиҵахьан Аԥсны ашьапылампыл Афедерациа анапхгаҩы изаамҭанытәим иалхрақәа ареспубликаҟны ашьапылампыл асразы имҩаԥысуа ачемпионат анхыркәшахалак ашьҭахь имҩаԥысраны иҟоуп ҳәа. Асеиԥш аӡбра, жьҭаарамза алагамҭазы Аԥсныҟа ConIFA аделегациа аараны иахьыҟоу иадҳәалоуп. Гәбаз иазгәеиҭеит аҽазыҟаҵаратә процесс амҩаԥысраан ААА (ФФА) анапхгаҩы дрымԥсахырц азы шакәуу заанаҵтәи, изаамҭанытәим алхрақәа мҩаԥыргарц зырыӡбаз.
Џьамал Гәбаз иара убасгьы иҳәеит, ихаҭагьы Аԥсны ашьапылампыл Афедерациа апрезидент ҳәа икандидатура ықәиргыларц игәы ишҭоу.
