АҞӘА, цәыббра 20 – Sputnik, Наала Аҩӡыԥҳа. Акультура аминистр Ельвира Арсалиаԥҳа хадас дызмаз аԥснытәи аделегациа Москва, Урыстәылатәи Афедерациа акультуратә ҭынхақәа рҳәынҭқарратә хьчара Адепартамент адиректор Владимир Цветнов ианиԥылоз аҭоурых-культуратә баҟақәа реиқәырхара аусхк аҟны аԥышәа аимдара иалацәажәеит. Абри атәы ҳзеиҭеиҳәеит Аԥсны Акультура аминистр лхаҭыԥуаҩ, аҭоурых-культуратә ҭынха аиқәырхара Адепартамент аиҳабы Баҭал Кәабахьиа.
Иара иажәақәа рыла, аганқәа ааԥын, Аҟәа иазыԥхьагәарҭоит ҩымштәи анаука-практикатә конференциа, абри атематика ала. Иҟоуп агәыӷра аконференциахь ареставрациа аҟазацәагь аап ҳәа.
"Аконференциа иалшоит ҳдепартаментқәа рыҩбагь рыбжьара еиҳа аинырра аҭахны иахьыҟоу ахырхарҭақәа раарԥшра, иалнаршоит ԥхьаҟазы аусмҩаԥгатәқәа реицынагӡара", — иҳәеит Баҭал Кәабахьиа.
Акультура аминистр лхаҭыԥуаҩ иажәақәа рыла, урыстәылатәи аколлегацәа азыхиоуп Аԥсны аҭоурых-культуратә баҟақәа рыхьчара анорматив-зинтә база азырхиараан аексперттә лахәра амҩаԥгара.
