АҞӘА, жьҭаара 9 — Sputnik, Бадраҟ Аҩӡба. Ахәаша, жьҭаара 9 рзы, Жәлар Реизара адепутатцәа реилатәараҟны аӡбаҩцәа алырхит.
Жәлар Реизара ақәҵарала Есма Қорсаиаԥҳа Аԥсны Иреиҳаӡоу Аӡбараҭа аӡбаҩыс далхуп.
"Атәыла Ахада иҳадигалаз акандидатурақәа Жәлар Реизара адепутатцәа ақәшаҳаҭхан ирыдыркылеит", — иҳәеит адепутат Валери Агрба.
Есма Қорсаиаԥҳа 2001 шықәса инаркны аус луеит Аԥснытәи аҳәынҭқарратә университет арҵаҩыс, алекциақәа дрыԥхьоит.
Адепутатцәа Қорсаиаԥҳа лкандидатура иадгылеит, иагьазгәарҭеит лзанааҭ ибзианы дшазҟазоу.
Арбитражтә ӡбарҭа аӡбаҩыс далхуп Манана Делԥҳа. Делԥҳа уаанӡа аус луан адукатцәа Рколлегиаҟны дукатс.
Апарламент аиҳабы Валерии Бганба иазгәеиҭеит Делԥҳа лкандидатура ишадгылатәу.
"Ҳара лара даадыруеит аԥышәа змоу усуҩык лаҳасабала. Сара агәра згоит асеиԥш иҟоу аусуҩцәа шаҳҭаху", — иҳәеит иара.
Делԥҳа Арбитражтә ӡбарҭаҟны аус луан иара анхацдырк инаркны, 1998 шықәса раахыс. Арбитражтә ӡбарҭа аӡбаҩ дихаҭыԥуаҩын. Ҩынтә далырххьан аӡбаҩцәа рхеилак ахантәаҩыс. Иахьазы аквалификациатә комиссиаҟны иаԥҵоу аԥышәаратә комиссиа далахәылоуп.
Жәлар Реизара аӡбрала Маиа Кәыҵниаԥҳа Аҟәатәи ақалақьтә ӡбарҭа аӡбаҩыс далхуп. 1998 шықәса рзы аус луан Аԥсны Иреиҳаӡоу Аӡбарҭаҟны бжьагаҩыс, иара убри аамҭазы ААУ аҟны алекциақәа дрыԥхьон. 2005 шықәса инаркны иахьанӡа — Аҟәатәи ақалақьтә ӡбараҭа аӡбаҩыс дыҟоуп. Хынтәны ӡбаҩыс далырхуеит.
Жәлар Реизара ақәҵарала Гәдоуҭатәи аӡбарҭа аӡбаҩцәас иалхуп Борис Аргәыни Лиудмила Ҷанԥҳаи.
1994 шықәса инаркны Борис Аргәын аус иуеит Гәдоуҭатәи аӡбарҭа аӡбаҩыс.
Лиудмила Ҷанԥҳа 1994-2010шш. рзы иара убасгьы аус луан Гәдоуҭатәи аӡбарҭа аӡбаҩыс.
