АҞӘА, жьҭаара 15 — Sputnik, Наала Аҩӡыԥҳа. Ахәыҷтәы рҿиара Аҩны "Аинар" аҟны иаатит Ҟабарда-Балкартәи асахьаҭыхыҩцәа рцәыргақәҵа "Ҟабарда-Балкариа аграфика". Ацәыргақәҵа ашьҭахь 40 рҟынӡа аҭыхымҭақәа Аԥсны аҳәынҭқарратә сахьатә галереиа иаҭахоит ҳамҭак аҳасабала.
Аԥсны Акультуреи аҭоурых-культуратә ҭынха ахьчареи рминистр Ельвира Арсалиаԥҳа иазгәалҭеит аԥсуеи аҟабардеи сахьаҭыхыҩцәа шықәсырацәалатәи реимадарақәа. Шықәсқәак раԥхьа Нальчик, Аҳәынҭқарратә музеи аҟны имҩаԥган аԥсуа сахьаҭыхыҩцәа рцәыргақәҵа, Аԥсны Амилаҭтә галереиа аҟынгьы акрааҵуеит ҟабардатәи асахьаҭыхыҩцәа русумҭақәа ҵәахуижьҭеи.
"Ари ацәыргақәҵа аинтерес аҵоуп, ахәшьарагьы дууп избанзар иаразнакы улаԥш аҿы иааиуеит ажәлар рытрадициақәеи иахьатәи ҳаамҭеи реиццәыргара. Араҟа ирацәоуп авторцәа – змилаҭтә культура еиуеиԥшымкәа иазнеиуа, иазыҟоу", — лҳәеит лара.
Урыстәылатәи асахьаҭыхыҩцәа Рхеилак Ҟабарда-Балкариатәи аҟәша ахантәаҩы Геннадии Темирканов игәаанагарала, асеиԥш иҟоу ауснагӡатәқәа рымҩаԥгара аԥсуеи аҟабарда-балкартәи культурақәа рбеиара иацхраауеит.
"Асеиԥш иҟоу ацәыргақәҵақәа заҟа ирацәахо аҟара ибеиахоит ҳажәларқәа рдоуҳа, ибеиахоит иааиуа абиԥарақәа. Аҳәынҭқарра адунеи аԥшӡара азаазго ауааи акультуреи рыла акәзар ҟалап ишышьақәгылогьы", — ҳәа азгәеиҭеит Темирканов.
Урыстәылатәи асахьаҭыхыҩцәа Рхеилак Ҟабарда-Балкариатәи аҟәша ацәыргақәҵа "Ҟабарда-Балкариа аграфика" мҩаԥысуеит апроект "Адунеи апалитра" аҳәаақәа ирҭагӡаны. Ацәыргақәҵа аекспозициаҟны иҟоуп "Ҟабардатәи алакәқәа", "Адыга ашәақәа", "Нарҭаа рҳәамҭақәа" (Заурбек Бгажноков), Жабги Ҟазаныҟәа иилиустрациақәа, Сииареи Иакуби Аккизоваа русумҭақәа у.у.е.
