АҞӘА, жьҭаара 29, Sputnik, Роберт Џьапуа. Жьҭаара 29, аԥшьаша имҩаԥысуаз аилатәараҟны Аԥсны Аминистрцәа Реилазаара ажәалагала ҟаҵан "Ахәыҷырацәа змоу аҭаацәарақәа рыцхыраагӡақәа рзы" Ақәҵара аԥсахрақәа алагалахаларц.
"Абасеиԥш ишьақәыргылоуп есымзатәи аԥарацхыраагӡа ахышәа-ҵышәа: 3-5-ҩык ахәыҷқәа змоу – хәышә-хәышә мааҭ хәыҷыцыԥхьаӡа, 6-9-ҩык ахәыҷқәа змоу - быжьшә-быжьшә мааҭ хәыҷыцыԥхьаӡа, 10-ҩык инареиҳаны измоу – зқьы-зқьы мааҭ хәыҷыцыԥхьаӡа", — иҳәеит аилатәараан Аԥсны аџьеи, аусурҭа аҭареи, асоциалтә еиқәыршәареи рминистр Сурен Кереселиан.
Аминистр иажәақәа рыла ацхыраагӡа ҩынтә рыла еиҳахеит, абиуџьет азы ахьанҭара 40 миллион мааҭ артәоит.
Аԥыза-министр Артур Амқәаб иазгәеиҭеит ԥхьаҟагьы асоциалтә программақәа ишрыцҵахо.
"Ҳара иарбанызаалак алшара анҳамоу ацхыраагӡақәа ирыцаҳҵоит. Иҟоу ауадаҩрақәа ирхьырԥшны урҭ аӡәгьы ирыгирхаӡом. Иеилкаауп ари аҩыза ацхыраара аҭаацәаратә проблемақәа шырмыӡбо, аха еиҳа-еиҳа иацаҳҵалоит. Уи тенденциак аҳасабала ҳазыҟоуп. Ԥхьаҟагьы иацҳамҵозар иагҳархом", — азгәеиҭеит аиҳабыра рхада.
Уаанӡа хҩык рҟынӡа ахәыҷқәа змаз ирзыршәон 150 мааҭ (хәыҷыцыԥхьаӡа), хәҩыки инареиҳани измаз – 300 мааҭ (хәыҷыцыԥхьаӡа), жәаҩыки инеиҳани измаз – 500 мааҭ (хәыҷыцыԥхьаӡа).
