АҞӘА, абҵара, Sputnik, Наала Аҩӡыԥҳа. Ахылаԥшратә палата иаанарԥшыз афинанстә еилагарақәа рзы аматериалқәа Апрокуратура хадахьы инашьҭхоит иҳәеит Ауаажәларратә палатаҟны аиԥылараан Рауль Ҳаџьымба.
"Ауаа зегьы ҭаҳкроуп ҳәа ҳҳәаӡом. Иаҳҭаху акы заҵәык ауп – ауаа еилыркаароуп аҳәынҭқарратә ԥарақәа шырхынҳәтәу", — ҳәа азгәеиҭеит Ҳаџьымба.
Ари аӡәырҩы рзы урокны иҟалароуп ԥхьаҟагьы усеиԥш ҟамларцаз иҳәеит Ахада.
Ҳаџьымба иажәақәа рыла Ахылаԥшратә палата агәаҭарақәа мҩаԥнагеит иара ахаԥшьгаралеи атәыла анапхгара рыҳәаралеи.
"Алҵшәақәа убартә иҟоуп. Ҳара РУПқәеи МУПқәеи аԥаҳҵеит, урҭ рхадацәа арҭ анаплакқәа рхатәыртәит, ишырҭахыз еиԥш ирызныҟәон", — иҳәеит иара.
Арҭ анаплакқәа рнапхгаҩцәа рнапы иакыз зегьы дара ишырҭахыз еиԥш ирызныҟәон ҳәа ациҵеит атәыла анапхгаҩы.
"Амыругақәа рыбжак ҭииуп, аусбарҭақәа рҵакырадгьылқәа ракәзар дара рхы иадмырхәозар қьырала ирҭиуан. Абарҭ апроцессқәа ирылахәу зегьы ахашәала роуеит, иара убри аан акгьы змауаз аҳәынҭқарра заҵәык ауп", — инаҵшьны иазгәеиҭеит Ҳаџьымба.
Ахара зду рполитикатә позициа иахьырԥшымкәа аҭакԥхықәра рыдлоит ҳәа агәра диргеит атәыла Ахада еизаз.
"Араҟа иарбанызаалак аполитикатә план ахьырԥшра залшом. Апрокуратура алкаақәа дара русура ахаҭабзиара иахылҵуеит. Ахаара зду зегьы ахьырхәхоит", — ҳәа азгәеиҭеит Ҳаџьымба.
Ахадеи Ауаажәларратә палата ахаҭарнакцәеи аиԥылара рыман Аҟәа, аҩаша. Иараҟны ирылацәажәан аполитикатәи асоциал-економикатәи зҵаарақәа.
