Аветеренар Мариа Савинкова ҳкорреспондент изеиҭалҳәеит лзанааҭ шалылхыз атәи ари азанааҭ алызхырц зылшо аԥстәқәа акрырҿазҵо, ирхылаԥшуа, изхәышәтәуа, атәым хьаа згәы знархьуа шракәу.
Лара иазгәалҭоит ари азанааҭ азыҟаҵара бзиа шаҭаху.
"Ари азанааҭ уи адагьы аҵара бзиа аҭахуп. Абиологиа уазҟазазароуп. Заԥхьаҟа иҳақьымхараны иҟоу аиҳабыратә классқәа рҟны ахимиеи абиологиеи рыбзиабара илалароуп. Ашкол ашьҭахь иреиҳау аҵараиурҭаҟны акәзаргьы хәышықәса аҵара уҵароуп, аџьабаа убароуп. Анатомиа, афизиологиа, атерапиа, ахирургиа – ирацәоуп зыҭҵаара аҭахны иҟоу. Аҵара ашьҭахь аԥстәқәа аус рыдууло уаныҟалалак ашьҭахь ауп уҟазоуп ҳәа ухы иазуҳәар анауа", — лҳәоит Мариа Савинкова.
Савинкова лажәақәа рыла уаанӡа аклиникахь еиҳарак иааргоз алақәа ракәын, урҭгьы шәарыцалақәан.
"Ауаа ирыздырам аԥстәқәагьы иреиҷаҳаны акыршырҵатәалу. Уажәшьҭа аҽакала рызнеира иалагеит. Еилыркаауа иалагеит аԥстәқәагьы дасу рхатәы фатә рымазар шакәу – рызҳаразы, ргәабзиаразы", — лҳәоит аветеренар.
Мариа Савенкова иазгәалҭоит ашәарыцара аамҭазы арахь ишаарго ашәарыцараҟны ааха зауз алақәа. Иара убасгьы аҵыхәтәантәи аамҭақәа рзы ирацәахеит ачыраҿыцқәа змоу аԥстәқәа. Ачыра ԥҟарыла иқәаагоит ҳәа лҳәоит лара.
Зегьы иргәалашәалароуп зыԥсы ҭоу аҿаԥхьа аҭакԥхықәра шыҟоу. Уи шыхәмаргам. Зыԥсы ҭоу акрафароуп, иныҟәароуп, икәабатәуп, ирныҟәатәуп. Иарбанызаалак ԥстәык ма ԥсаатәк ааӡара ижәгозар, аԥхьа, иҟашәҵо цқьа шәазхәыцны, ишәаны-изаны иҟашәҵа ҳәа рабжьылгоит аветеренар.
Иҵегь инарҭбааны Мариа Савникова линтервиу: аԥстәқәа, аԥсаатәқәа бзиа иумбозар урҭ узыхәышәтәуам>>
