Гәылрыԥшь араион анаплакқәа руак аҿы амандарин аҟәшәара иалагеит абҵара 16 рзы. Уи анапхгаҩы Витали Ҵәыџьба иажәақәа рыла, сынтәа аҽаҩра уамак ирацәаӡам, уи мзызс иамоугьы аԥхын ақәақәа маҷны иахьлеиуаз ауп. Sputnik акорреспондент излеизеиҭеиҳәаз ала, аҽаҩра аҟәшәараҿы ацхыраара ҟарҵоит аҭыԥантәи ауаа реиԥш, Урыстәылеи Украинеи рҿынтәгьы аусуцәа. Есыҽны амандарин аҟәшәара рхы аладырхәуеит хә-бригадак, бригадацыԥхьаӡа 25-ҩык ауаа ыҟоуп.
Ари анаплакаҿы амандарин ақәаарыхырҭақәа хацыркын 1962 шықәсазы. Иахьатәи амш азы 60 нызықь шьапы ыҟоуп. Бжьаратәла иаагозар, есышықәса дара иҳарҭоит 650 тонна амандарин. Аԥхын изныкымкәа амандарин аҵлақәа иҷыдоу ахәшәқәа рыла ирхәышәтәуеит, ачымазарақәа рцәыхьчаразы. Иара убас аԥхын амандарин акәша-мыкәша аҳаскьын хырҟьоит аҟәшәараан ирԥырхагамхарц.
