АҞӘА, абҵара 21 — Sputnik. Урыстәыла Адәныҟатәи аусқәа рминистрра адырра ҟанаҵоит Мали иҭахаз рыбжьара Урыстәыла атәылауаа ыҟоуп ҳәа. Урҭ рыхьӡқәа ҳәахоит еиҳа ишьақәырӷәӷәоу аинформациа аныҟалалак ашьҭахь лҳәеит Урыстәыла Адәныҟатәи аусқәа рминистрра аофициалтә хаҭарнак Мариа Захарова.
"Абҵара 20 рзы, Мали иҟалаз атеракт инадҳәаланы Мали иҟоу Урыстәыла Ацҳаражәҳәарҭа ишьақәгылаз аҭагылазаашьа аилкаара нап аланакит. Абҵара 21, ашьыжь еилкаахеит иҭахаз рыбжьара ҳтәылауаагьы шыҟоу", — лҳәеит лара.
Захарова иара убасгьы иазгәалҭеит еиҳа иныҭкаау аинформациа аныҟалалак ашьҭахь урҭ рыхьыӡқәа рылаҳәахоит ҳәа.
Уаанӡатәи адыррақәа рыла, ахәашаҽны бџьарла еибыҭаз ауаа асасааирҭа Radisson иақәланы шасыс 170–ҩык ауаа ргеит ҳәа. Иара убасгьы иазгәаҭан 27–ҩык шьуп ҳәа. Мали апрезидент Ибрагим Бубакар Кеит аҳәамҭа ҟаиҵеит зежәҩык шьуп, быжьҩык хәуп, ҩыџьа атеррористцәа ҭархоуп ҳәа.
Атеррористтә акт азы аҭакԥхықәра ахахьы иагеит атеррористтә гәыԥ "Аль-мурабитун". Уаанӡа асеиԥш иҟаз атеррористтә актқәагьы урҭ рхахьы иргахьан.
